Qonunchilik palatasining 85 foiz deputatlari vaksina olgani ma’lum qilindi

Oliy Majlis Qonunchilik palatasining 85 foiz deputatlari emlangan. Bu haqda quyi palata axborot xizmati xabar qildi.

16-avgust kuni bo‘lib o‘tgan Oliy Majlis Qonunchilik palatasi majlisida Qonunchilik palatasi spikeri Nurdinjon Ismoilov vaksinatsiya jarayoni haqida fikr bildirib o‘tdi.

Ma’lum bo‘lishicha, O‘zbekiston Oliy Majlis Qonunchilik palatasi spikeri va uning o‘rinbosarlari to‘liq emlangan.

Shuningdek, Qonunchilik palatasining 85 foiz deputatlari vaksina olgan bo‘lib, 10 foizining emlanishi shifokor ko‘rsatmasiga asosan keyinroqqa qoldirilgan, qolgan deputatlar esa shu kunlarda vaksina olishi kutilmoqda.

Bundan avval O‘zbekistonda harbiy xizmatchilarning qariyb 100 foizi COVID-19 ga qarshi emlangani, O‘zbekistonda koronavirusga qarshi 11,3 mln dozadan ortiq vaksina qo‘llanilgani hamda bosh vazir o‘rinbosari Sardor Umurzoqov koronavirusga qarshi Moderna vaksinasi bilan emlangani haqida xabar berilgandi.