Talabaning o‘qishini Toshkent davlat yuridik universitetiga ko‘chirib bermoqchi bo‘lgan firibgar ushlandi, deya xabar qilmoqda Bosh prokuratura huzuridagi Departament matbuot xizmati.
Departament hamda DXXning Jalaquduq tumani bo‘limlari tomonidan o‘tkazilgan tezkor tadbirda fuqaro L.N. fuqaro M.ning Qirg‘izistonning Jalolobod shahridagi zamonaviy xalqaro universitetidagi o‘qishini yuqori lavozimda ishlovchi tanishlari orqali Toshkent davlat yuridik universitetiga ko‘chirib berish evaziga 3000 AQSh dollarini firibgarlik yo‘li bilan olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Samarqandda fuqaroni 17 ming dollar evaziga magistraturaga kiritib qo‘yishni va’da qilgan shaxs ushlangani, Facebook’da o‘zini Korrupsiyaga qarshi kurashish agentligi xodimi sifatida tanishtirgan shaxs fuqaroni 11 ming dollarga chuv tushirgani hamda Toshkent, Buxoro va Samarqandda fuqarolarni o‘qishga kiritish hamda o‘qishini ko‘chirib berish bilan shug‘ullanmoqchi bo‘lgan shaxslar ushlangani haqida xabar berilgandi.
Izoh (0)