Qashqadaryo hokimi Zoir Mirzayev tanqididan so‘ng Dehqonobod va Shahrisabz tumani hokimliklarini o‘rab turgan panjaralar ham olib tashlandi. Bu haqda tuman hokimliklarining axborot xizmatlari xabar berdi.
Ma’lum bo‘lishicha, Dehqonobod hokimi Zoir Aliqulov va Shahrisabz tumani hokimi Samad Hasanov hokimlik binosini o‘rab turgan panjaralni olib tashlash haqida 16-avgust kuni topshiriq bergan. Va shu kuni har ikkala hokimlikda ham panjaralar olinmoqda.
Viloyat rahbari panjarali hokimliklar haqida so‘z yuritib, “Nimaga hokimlik yopiq joy bo‘lishi kerak? Men viloyat hokimligiga chaqirilgan hokimlarni har safar hokimlik oldidan olib kirishni buyuraman, nimaga? Hokimlar shu tomondan kirsa, panjara yo‘qligini ko‘radi. Men hokimlik binosiga kirayotgan yo‘lda panjara yo‘q. Buni aqli yetgan tushunadi”, — deya hokimliklarning panjara bilan o‘rab qo‘yilganini tanqid qilgandi.
“Daryo” muxbirining qo‘shimcha qilishicha, ayni kunda viloyatning Chiroqchi, Kitob va Yakkabog‘ tumani hokimliklaridagi panjara to‘siqlar olib tashlanmagan.
Eslatib o‘tamiz, avvalroq Koson tuman hokimligi ham tanqiddan xulosa qilib, hokimlik oldidagi temir panjalarni olib tashlagani haqida xabar berilgandi.
Izoh (0)