Швеция ва Дания олимлари ўрта ёшдаги аёллар бўйининг пасайиши бевақт ўлим хавфини оширади деган хулосага келди. Тадқиқот натижалари БМЖ Опен нашрида эълон қилинган, деб хабар беради «Korrespondent.net».
Таъкидланишича, 50 ёшдан кейин кўплаб инсоннинг бўйи пасайишни бошлайди. 70 ёшдан кейин тезлашадиган жараён умуртқа дискаларининг зичлашувига, умуртқанинг компрессион синиши ва гавданинг қийшайишига олиб келиши мумкин.
Шу билан бирга, қатор янги тадқиқотларнинг кўрсатишича, бўйнинг пасайиши юрак-қон томир касалликлари хавфининг ортишидан далолат беради. Гетеборг ва Копенгаген университети мутахассислари Швеция ва Даниядаги 1908 йилдан 1952 йилга қадар туғилган 2406 нафар аёлни кузатган.
Аёлларнинг бўйи икки марта ўлчанган: 30 дан 60 ёшга тўлишига қадар ва орадан 10-13 йил ўтгач. Бу вақт давомида тажриба иштирокчиларининг бўйи ўртача 0,8 сантиметрга пасайган, бироқ айримлариники ўзгармаган, баъзилар эса 14 сантиметргача бўй йўқотган.
Иккинчи ўлчашдан кейинги 17-19 йил давомида олимлар уларнинг ўлимлари сабабини кузатган. Ушбу давр мобайнида 625 нафар аёл вафот этган бўлиб, уларнинг 157 нафарининг ўлимига юрак-қон томир касалликлари сабаб бўлган.
Таҳлилларнинг кўрсатишича, йўқотилган ҳар бир сантиметр бўй швед аёлларида 14 фоизга, данияликларда эса 21 фоизга ўлим хавфини оширган. Шу билан бирга, йўқотилган ҳар икки сантиметрда ушбу кўрсаткич мос равишда 74 ва 80 фоизга ошган.
Умумлаштирилган таҳлилларга кўра, аёллар бўйининг сезиларли даражада пасайиши инсульт ва юрак-қон томир касалликларининг икки баробарга, шунингдек, бошқа касалликлардан вафот этиш хавфини 71 фоизга оширган.
Тадқиқот муаллифларининг қайд этишича, бўйга боғлиқ муаммони бартараф этишга мунтазам жисмоний фаоллик ёрдам бериши мумкин.
Изоҳ (0)