O‘zbekiston Markaziy Osiyo yetakchi ayollar muloqotini mintaqadagi ayollar o‘rtasida har tomonlama hamkorlikni rivojlantirishga qaratilgan yangi, yuqori sifatli maslahatlar platformasi sifatida shakllantirishga barcha sa’y-harakatlarni safarbar qiladi. Bu haqda 6-avgust kuni Turkmanboshida Markaziy Osiyo davlatlari rahbarlarining navbatdagi Maslahat uchrashuvi bilan parallel ravishda o‘tkazilgan Markaziy Osiyo yetakchi ayollari muloqotining forumida O‘zbekiston Oliy Majlisi Senati raisi Tanzila Norboyeva ma’lum qildi.
Yig‘ilishda so‘zga chiqqan Tanzila Norboyeva ayollarning huquq va imkoniyatlarini kengaytirish sari muloqotning transformatsion o‘zgarishlarni amalga oshirish qobiliyatiga optimistik munosabatda ekanini ta’kidlagan. U davlat boshqaruvi, preventiv diplomatiya, atrof-muhitni muhofaza qilish, tadbirkorlik va biznes, madaniyat, ta’lim, ilm-fan, san’at va gender tengligini ta’minlash sohalarida Markaziy Osiyo davlatlari ayollari o‘rtasidagi hamkorlikni rivojlantirish va mustahkamlashga ishonch bildirgan.
Tadbir davomida “Ayollar, tinchlik va xavfsizlik” kun tartibi, 2030-yilgacha barqaror rivojlanish kun tartibi, Global maqsadlarga erishish uchun harakatlar o‘n yilligiga muloqotning sodiqligini tasdiqlaydigan Markaziy Osiyo mamlakatlari yetakchi ayollari forumi deklaratsiyasi qabul qilingan. Shuningdek, ushbu hujjatda Markaziy Osiyoda ayollarning ilmiy, texnik, ijodiy, intellektual va tadbirkorlik salohiyatini to‘liq amalga oshirishning samarali usullarini ishlab chiqish, ayol va qizlarning tadbirkorlik sohasidagi imkoniyatlarini kengaytirish bo‘yicha sa’y-harakatlarni davom ettirish tarafdori bo‘lgan muloqotning nuqtayi nazari qayd etilgan.
Forum yakunida muloqot ishtirokchilari hamkorlikni yanada kengaytirish, ushbu mintaqaviy platformaning samarali ishlashini ta’minlash uchun ijobiy tajriba almashish va Markaziy Osiyo mamlakatlari manfaati uchun mintaqaviy sheriklikni chuqurlashtirishga muhim hissa qo‘shish zarurligi to‘g‘risida kelishib olgan.
Forumda nutq so‘zlagan BMT Bosh kotibining Markaziy Osiyo bo‘yicha Maxsus vakili Natalya German ayollarning to‘liq iqtisodiy ishtirokisiz gender tengligiga erishish imkonsizligini ta’kidlagan. “Shuning uchun ham muloqotimizning bu yo‘nalishdagi faoliyati juda muhim. Ayollarning iqtisodiy salohiyati va iqtisodiy hamkorligining rivojlanishi shubhasiz mintaqaning rivojlanishi, yangi imkoniyatlar ochilishi, barqaror tinchlik va xavfsizlikka hissa qo‘shishiga yordam beradi”, — deydi Natalya German
Eslatib o‘tamiz, Markaziy Osiyo davlatlari yetakchi ayollarining muloqotini tashkil etish bo‘yicha videokonferensaloqa shaklida ilk uchrashuv 2020-yilda o‘tkazilgan edi.
Izoh (0)