Toshkent viloyati Angren shahridagi ko‘p qavatli turar joy binolarining birida yong‘in sodir bo‘ldi, deb xabar beradi FVV matbuot xizmati.
Ma’lum qilinishicha, 5-avgust kuni soat 09:00 da Toshkent viloyati Favqulodda vaziyatlar boshqarmasiga Angren shahri 5/1 dahasida joylashgan to‘qqiz qavatli uyning 6-qavatida yong‘in sodir bo‘layotgani to‘g‘risida xabar kelib tushgan.
FVVning yong‘in-qutqaruv guruhlari voqea joyiga besh daqiqa ichida yetib borgan. Qutqaruvchilar tomonidan yong‘inni o‘chirish bilan bir vaqtda binoning yuqori qavatidagi fuqarolarni evakuatsiya qilish ishlari ham amalga oshirilgan.
“Bir necha daqiqa ichida 25 nafar fuqaro xavfsiz joyga olib chiqilib, yong‘in soat 09:38 da to‘liq bartaraf etilgan. FVV xodimlarining aniq va tezkor harakatlari natijasida jabrlanish va halok bo‘lish holatlariga yo‘l qo‘yilmadi”, — deyiladi xabarda.
Yong‘in oqibatida xonadonning 50 kvadrat metr maydoni zararlangan. Hozirda mutaxassislar tomonidan yong‘in sababi aniqlanmoqda.
Avvalroq Qo‘qonda bir-biriga tutash 5 ta xonadonda yong‘in sodir bo‘lgani, Samarqandda 5 ta xonadonda yong‘in yuz bergani, Yunusoboddagi ikkita xonadonda yong‘in sodir bo‘lgani hamda Namangandagi hovlida yong‘in chiqib, uchta qo‘shnining uyiga ham zarar yetgani haqida xabar berilgandi.
Izoh (0)