Sog‘liqni saqlash vazirligi O‘zbekistonda turli aholi qatlamlarining bugungi kunda vaksinatsiya bilan qamrab olinganlik darajasi to‘g‘risida ma’lumot berdi.
Foto: “Daryo” / Madina Nurman
3-avgust holatiga ko‘ra, aholi qatlamlari kesimida emlash ko‘rsatkichlari quyidagicha:
- 65 yoshdan katta fuqarolar — 1 350 573 doza;
- tibbiyot xodimlari — 887 041 doza;
- maktab o‘qituvchilari — 964 112 doza;
- maktabgacha ta’lim muassasalari xodimlari — 360 532 doza;
- surunkali kasalligi borlar — 1 290 655 doza vaksina bilan emlangan.
Vaksinalarning qolgan qismi esa boshqa aholi qatlamlari uchun sarflangan.
Eslatib o‘tamiz, O‘zbekiston davlat bosh sanitariya vrachi qaroriga asosan 2021-yil
- 1-sentabrgacha 18 yoshdan katta bir qancha aholi qatlamlari koronavirus infeksiyasiga qarshi 1-doza vaksinalari;
- 1-oktabrgacha 2-doza vaksinalari;
- 1-noyabrgacha 3-doza vaksinalari bilan ommaviy emlanishi (salomatligi bo‘yicha qarshi ko‘rsatma bo‘lgan hollar mustasno) shartligi belgilangan edi.
O‘zbekistonda 3-avgust holatiga ko‘ra, jami 8 318 126 doza vaksinadan foydalanilgan. Emlash jarayoniga qamrab olingan jami aholi soni 5 453 534 nafarni, shu kungacha koronavirusga qarshi to‘liq emlab bo‘linganlar soni esa 1 257 768 nafarni tashkil qilmoqda.
2021-yilda xarid qilingan barcha vaksinalarga 44 million 761,5 ming dollar sarflangan. Ulardan o‘zbek-xitoy vaksinasiga 39 million 100 ming dollar, “Sputnik V” vaksinasiga 3 million 681,5 ming dollar va AstraZeneca vaksinasiga 1 million 980 ming dollar sarflangan.
30-iyul kuni O‘zbekistonga koronavirusga qarshi 3 million 60 doza Moderna vaksinasi olib kelindi. Mamlakatga 1,2 million dozada Pfizer vaksinasi ham olib kelinishi kutilmoqda.
