«Тошкент» телеканалининг «Пойтахт йўлларида» кўрсатувида хизмат вазифасини олиб бораётган ЙПХ ходими билан содир бўлган яна бир лавҳа ижтимоий тармоқларда тарқалди. Бу сафар қоидабузар Malibu’ни тўхтатган инспектор телефон қўнғироғи сабаб ҳайдовчини қўйиб юборишга мажбур бўлган.
Видеодан кўриш мумкинки, Тошкент вилояти Олмалиқ шаҳрида хизмат олиб бораётган ЙПХ ходими автомобилни бошқариш вақтида телефонда гаплашган Malibu-2 автомобилини тўхтатган. Қизил рангли машинани бошқариб келаётган аёл телефонда гаплашмаганини, ҳозиргача 25 марта радар учун жарима тўлаганини айтиб, ЙПХ инспекторидан далолатнома тузмасликни сўраган.
«Бешта болам бўлса, уларни боқайми ёки жарима тўлайми… Ёлғиз аёл бўлсам… Бир йил деганда зўрга 25 та радарни тўладим», — деган аёл. Инспектор далолатномани расмийлаштириш вақтида аёл ўз телефонини узатиб, уни Абдураззоқ исмли шахс сўраётганини айтган. Телефонда гаплашган ЙПХ ходими гўшакнинг нарги тарафидаги шахсга «хўжайин» дея мурожаат қилиб, қоидабузар ҳайдовчига ҳаракатланишни давом эттиришга рухсат берган.
Таъкидлаш керакки, 2 август куни ижтимоий тармоқларда «Пойтахт йўлларида» кўрсатувининг яна бир лавҳаси кенг тарқалган эди. Унда ҳам Malibu’ни тўхтатган ЙПХ ходими рация орқали бўлган буйруқ сабаб қоидабузарни қўйиб юборишга мажбур бўлган.
Мавзуга доир:
Изоҳ (0)