Ijtimoiy tarmoqlarda Qashqadaryo hokimi Zoir Mirzayev qabulida bo‘lgan onaxon noma’lum sababga ko‘ra qizi tomonidan tahqirlangani tasvirlangan video tarqaldi. “Mening yurtim” telekanalining “Markaziy studiya” dasturi orqali e’lon qilingan lavhada zo‘ravonlik sodir etgan ayol onasini urmaganini, tarqalgan video montaj ekanligini ta’kidlagan.
Qayd etilishicha, Qarshi shahridagi 18-sonli yotoqxonada istiqomat qiluvchi nogironligi bor oilaning keksa yoshli a’zosi Qarshi shahar hokimligida turib, viloyat hokimi Zoir Mirzayev bilan Zoom orqali muloqot qilgan va oilaga ikki xonali uy qurib berilishini so‘ragan. Internetda tarqalgan videoni suratga olgan va vaziyatni izohlagan mas’ulning aytishicha, qiz onasini viloyat rahbaridan eplab pul so‘rab ololmagani uchun tahqirlagan.
“Yordam so‘rab borganida uni bo‘lar-bo‘lmas narsalar bilan tuhmat, montaj, fotoshop qilib, ijtimoiy tarmoqlarga chiqarib yuborishdi... Har doim urib, qiynab kelgan deb yolg‘ondan izoh qoldirishyapti, qani menga isbotlab berishsin”, — deydi ayol.
Yotoqxonada yashovchi qo‘shnilarning so‘zlariga ko‘ra, Ozoda Himmatova onasini muntazam tahqirlab keladi. Onasining oldiga qattiq non bilan suv berib qo‘yib, ko‘chaning boshiga chiqarib qo‘yish holatlari ham bo‘lgan.
Qarshi shahar hokimligining ma’lumotlariga ko‘ra, 2020—2021-yillarda shahar hokimligi va homiylar tarafidan ushbu oilaga 56 million 500 ming so‘mlik moddiy yordam, uy-joy qurish uchun 2 sotix yer va yaqinda oilaning bo‘yi yetib qolgan qizining to‘yi uchun oziq-ovqat mahsulotlari bergani, keksa onaxonga esa nogironlik aravachasi va gigiyena mahsulotlari yetkazilgan.
Izoh (0)