Toshkentda o‘zini harbiy xizmatchi deya tanishtirib, fuqarolarni 80 mln so‘mga chuv tushirgan shaxs ushlandi

Toshkentda 1-iyun kuni “Olx.uz” e’lonlar servisi orqali fuqarolarni chuv tushirib yurgan A.A. ismli shaxs qo‘lga olindi. Bu haqda IIV Kiberxavfsizlik markazi axborot xizmati xabar berdi.

Ma’lum qilinishicha, gumonlanuvchi “Olx.uz”ga Toshkent markazida joylashgan barcha qulayliklarga ega xonadonni arzon narxda ijaraga berishi haqida e’lon joylashtirgan. Murojaat qilganlarga o‘zini harbiy xizmatchi deb tanishtirib, boshqa viloyatda ekanini va xizmat safaridan 2-3 kunda poytaxtga qaytgach, ijaraga oluvchiga xonadonni ko‘rsatishini, ammo boshqa odamga ijaraga bermaslik uchun oldindan plastik kartasiga pul o‘tkazib berishi kerakligini aytib kelgan.

Shu tariqa, firibgar 100 dan ortiq fuqarolarning har biridan 200 ming so‘mdan 2 million so‘mgacha, bir yil davomida 80 million so‘mdan ortiq pullarni o‘zlashtirgan.

Hozirda A.A.ga nisbatan ehtiyot chorasi qo‘llanilgan, uning jinoiy sheriklarini aniqlash bo‘yicha surishtiruv va tergov olib borilmoqda.

Avvalroq Toshkentda qalbaki valyutalar evaziga telefon xarid qilib, o‘nlab fuqarolarni chuv tushirgan shaxs qo‘lga olingani, Samarqandda fuqaroni 50 ming dollarga chuv tushirgan advokat ustidan jinoyat ishi qo‘zg‘atilgani, Qashqadaryoda 14 yoshli qizning “boshini aylantirib”, otasiga tegishli 7,3 ming dollarni qo‘lga kiritgan yigit ushlangani to‘g‘risida xabar berilgandi.