Toshkentda A.X. ismli fuqaro bir nafar farzandining 18 yoshigacha aliment pullarini oldindan to‘lov sifatida biryo‘la 800 million so‘m to‘ladi. Bu haqda Majburiy ijro byurosi matbuot xizmati “Daryo”ga ma’lum qildi.
Ma’lum qilinishicha, byuroning Uchtepa tuman bo‘limi ish yurituviga fuqarolik ishlari bo‘yicha Uchtepa tumanlararo sudining qarzdor A.X.dan undiruvchi G.S. foydasiga 2016-yilda tug‘ilgan bir nafar farzandining moddiy ta’minoti uchun 1/4 qism miqdorida aliment undirish to‘g‘risida ijro hujjati kelib tushgan.
Unga asosan davlat ijrochisi tomonidan ijro ishi qo‘zg‘atilgan va qarzdor bu haqida o‘z vaqtida xabardor qilingan.
Qarzdor ota o‘zining otalik mas’uliyatini his qilgan holda 5 yashar farzandining kelajagi uchun aliment to‘lash tartibini o‘zgartirish uchun sudga murojaat qilgan. Bunga ko‘ra, qarzdorning da’vo arizasi fuqarolik ishlari bo‘yicha Uchtepa tumanlararo sudining 2021-yil 4-iyundagi ijro varaqasiga asosan qanoatlantirilgan.
Ota 2021-yildan 2034-yilgacha, ya’ni farzandining 18 yoshigacha aliment pullarini oldindan to‘lov sifatida biryo‘la 800 million so‘mni to‘liq to‘lab bergan.
Eslatib o‘tamiz, 2020-yilda buxorolik erkak ikki xotiniga birdaniga 810 mln so‘mdan ortiq alimentni oldindan to‘lab bergan, qarshilik ota aliment o‘rniga farzandlariga uy bergan, farg‘onalik ota ikki farzandi uchun aliment o‘rniga Spark bergandi.
Izoh (0)