Shavkat Mirziyoyev 28-iyul kuni bo‘lib o‘tgan yig‘ilishda yana bir bor aholiga murojaat qilib, koronavirusga qarshi emlanishga chaqirdi.
Prezidentning ma’lum qilishicha O‘zbekiston 29-iyulda AQShdan yuborilgan Moderna vaksinasining 3 million doza vaksinasini qabul qilib oladi.
“Pandemiya yana avj olib ketdi. Qancha-qancha imkoniyatimiz, zaxiramiz ketyapti. Boshqa yo‘limiz yo‘q — xalqimizning sog‘lig‘ini o‘ylashimiz kerak. Qancha kerak bo‘lsa, shuncha beramiz. Kurashimizni davom etamiz, lekin yana bir marta shu fursatdan foydalanib, aziz hamyurtlarimga yana bir marta iltimos qilmoqchiman, o‘z sog‘lig‘ingizga o‘zingiz mas’ul va javobgarsiz.
Vaksinatsiya, vaksinatsiya va yana bir marta vaksinatsiya. 4-avgustda emas, ertaga (29-iyul) kelyapti AQShdan 3 million dona vaksina.
Har bir viloyat hokimlariga topshiriq berdim, vaksinatsiya bo‘yicha tizimli nazoratga olasizlar, qattiqqo‘llik bilan. Vaksina qilgan bemorni 4 kunda qo‘yib yuboryapmiz, emlanmaganlar juda qiynalyapti.
Shuni hozir qildirishimiz kerak, boshqa ilojimiz yo‘q. Vaksinasiz [bu kasallikni] davosi yo‘q. To‘g‘ri, vaksina qilganlar ham kasal bo‘lyapti, yengil kasal bo‘lib, uch-to‘rt kunda oyoqqa turib ketyapti”, — deydi Shavkat Mirziyoyev.
Davlat rahbarining qayd etishicha, O‘zbekiston olimlari tomonidan vaksina ishlab chiqilmoqda.
“‘Sputnik’ni o‘zimizda chiqarish bo‘yicha Rossiya rahbarlari bilan gaplashyapmiz. Hozirgi tahlillar shuni ko‘rsatyaptiki, bu balo bilan kamida hali 10 yil kurashishimizga to‘g‘ri keladi. Shunga tayyor bo‘lishimiz kerak. 2020-yil 14-martda aytganman, bu balo bilan kurashishga, yashashga, ishlashga o‘rganishimiz kerak. Biz u vaksinani har doim antitanachaga qarab, o‘zimizning sharoitimizga qarab, qonimizga qarab, qilishga majbur bo‘lamiz.
Shularni inobatga olib, vaksina ishlab chiqarishni o‘zimizda tashkil qilyapmiz. Albatta, men bir narsani aytmoqchiman, o‘zimizning vaksinani ham yaqinda JSSTga beramiz, o‘zimiz ham ishlayapmiz, katta mablag‘ berdik. Buning ustida, o‘zbek olimlarimiz ishlayapti.
Uni ham rivojlantirish bo‘yicha katta-katta ishlar qilyapmiz, lekin shu bilan birga hozircha biz mana shu Rossiya va Xitoy vaksinasini o‘zimizda ishlab chiqarish bo‘yicha juda katta chora-tadbir qilyapmiz”, — deydi Shavkat Mirziyoyev.
Izoh (0)