Шавкат Мирзиёев ҳокимларга вакцинация бўйича ишларни қаттиққўллик билан назоратга олишни топширди

Шавкат Мирзиёев 28 июль куни бўлиб ўтган йиғилишда яна бир бор аҳолига мурожаат қилиб, коронавирусга қарши эмланишга чақирди.

Президентнинг маълум қилишича Ўзбекистон 29 июлда АҚШдан юборилган Moderna вакцинасининг 3 миллион доза вакцинасини қабул қилиб олади.

«Пандемия яна авж олиб кетди. Қанча-қанча имкониятимиз, захирамиз кетяпти. Бошқа йўлимиз йўқ — халқимизнинг соғлиғини ўйлашимиз керак. Қанча керак бўлса, шунча берамиз. Курашимизни давом этамиз, лекин яна бир марта шу фурсатдан фойдаланиб, азиз ҳамюртларимга яна бир марта илтимос қилмоқчиман, ўз соғлиғингизга ўзингиз масъул ва жавобгарсиз.

Вакцинация, вакцинация ва яна бир марта вакцинация. 4 августда эмас, эртага (29 июль) келяпти АҚШдан 3 миллион дона вакцина.

Ҳар бир вилоят ҳокимларига топшириқ бердим, вакцинация бўйича тизимли назоратга оласизлар, қаттиққўллик билан. Вакцина қилган беморни 4 кунда қўйиб юборяпмиз, эмланмаганлар жуда қийналяпти.

Шуни ҳозир қилдиришимиз керак, бошқа иложимиз йўқ. Вакцинасиз [bu kasallikni] давоси йўқ. Тўғри, вакцина қилганлар ҳам касал бўляпти, енгил касал бўлиб, уч-тўрт кунда оёққа туриб кетяпти», — дейди Шавкат Мирзиёев.

Давлат раҳбарининг қайд этишича, Ўзбекистон олимлари томонидан вакцина ишлаб чиқилмоқда.

«‘Спутникъни ўзимизда чиқариш бўйича Россия раҳбарлари билан гаплашяпмиз. Ҳозирги таҳлиллар шуни кўрсатяптики, бу бало билан камида ҳали 10 йил курашишимизга тўғри келади. Шунга тайёр бўлишимиз керак. 2020 йил 14 мартда айтганман, бу бало билан курашишга, яшашга, ишлашга ўрганишимиз керак. Биз у вакцинани ҳар доим антитаначага қараб, ўзимизнинг шароитимизга қараб, қонимизга қараб, қилишга мажбур бўламиз.

Шуларни инобатга олиб, вакцина ишлаб чиқаришни ўзимизда ташкил қиляпмиз. Албатта, мен бир нарсани айтмоқчиман, ўзимизнинг вакцинани ҳам яқинда ЖССТга берамиз, ўзимиз ҳам ишлаяпмиз, катта маблағ бердик. Бунинг устида, ўзбек олимларимиз ишлаяпти.

Уни ҳам ривожлантириш бўйича катта-катта ишлар қиляпмиз, лекин шу билан бирга ҳозирча биз мана шу Россия ва Хитой вакцинасини ўзимизда ишлаб чиқариш бўйича жуда катта чора-тадбир қиляпмиз», — дейди Шавкат Мирзиёев.