Irem Helvajio‘g‘lu “Seni uzoq kutdim” serialidagi hamkasbi O‘zjan Deniz bilan janjallashgani haqidagi mish-mishlarga izoh berdi

O‘zjan Deniz va Irem Helvajio‘g‘lu suratga tushgan “Seni uzoq kutdim” serialini ko‘pchilik o‘tgan mavsumning eng omadsiz loyihasi deb atalmoqda.

Yuqori reytinglardan o‘rin olishiga umid qilingani, serialni suratga olish uchun katta mablag‘ tikilganiga qaramay, loyiha muxlislar qalbidan joy olishga muvaffaq bo‘lmadi. Ko‘plab tanqidchi va tomoshabinlarning fikricha, serialning muvaffaqiyatsizligiga undagi bosh qahramonni gavdalantirgan juftlikning bir-biriga mos emasligi sabab bo‘lgan. Reyting ko‘rsatkichlarida past natija qayd qilingani tufayli serial erta tugatilgan.

Serial finali efirga uzatilganidan keyin O‘zjan Deniz Irem bilan birga tushgan barcha suratlarini Instagram sahifasidan o‘chirib tashlagan. Aktyor muxlislarni hayratlanishiga sabab bo‘lgan ushbu xatti-harakatiga nima asos bo‘lgani haqida lom-lim demagan. Irem ham shunday yo‘l tutgan, ammo hamkasbidan farqli o‘laroq bo‘lib o‘tgan hodisa yuzasidan jurnalistlarga izoh bergan:

“Ochig‘ini aytganda, o‘zim ham aslida nima bo‘lganini tushunmadim. Men O‘zjanga hech qanday yomonlik qilmadim, mendan xafa bo‘lishiga hech qanday sabab yo‘q. Birga tushgan suratlarimizni o‘chirganini bilgandan keyin hayron qoldim. Men nega fotosuratlarni o‘chirib tashladim? Bu shunchaki uning qilmishiga nisbatan javob reaksiya, boshqa narsa emas. Biz janjallashganimiz yo‘q, faqat haligacha muhokama qilinayotgan fotosuratlar bilan bog‘liq yoqimsiz hodisa bor xolos”, — degan Irem.

Avvalroq aktrisa bergan intervyularida suratga olish maydonchasida ijodiy faoliyati bilan bog‘liq ayrim tushunmovchiliklar bo‘lishi haqida ta’kidlagan.

Ma’lumot uchun, “Muhtasham yuz yil”, “So‘yla Qora dengiz” singari seriallarda suratga tushgan Irem Helvajio‘g‘lu aktrisalikdan tashqari modellik bilan ham shug‘ullanadi.