Toshkent metropoliteni 63,3 million yevroga 10 ta poyezd sotib oladi. Bu hukumat qarori bilan tasdiqlangan loyihada keltirib o‘tilgan, deya xabar bermoqda Spot.
Poyezdlarni sotib olish kredit shartnomalari imzolangan aprel oyida ma’lum bo‘lgandi. Ammo shartnomaning boshqa tafsilotlari yaqinda e’lon qilindi.
Xarid, asosan, kredit mablag‘lari hisobidan amalga oshiriladi. Asosiy mablag‘lar — “VEB.RF” korporatsiyasi (30,4 million yevro), “Roseksimbank” (24,4 million yevro) va davlat budjetidan (8,7 million yevro) ajratiladi.
Vagonlarning o‘zi 50,7 million yevroni tashkil etadi, qolgan mablag‘lar komponentlar, kreditlarni sug‘urtalash, bojxona rasmiylashtiruvi va boshqalar hisoblanadi. O‘zbekiston 2031 va 2032-yillarga qadar kreditlarni qaytarishi kerak.
Harakatlanuvchi tarkib Moskva yaqinidagi “Metrovagonmash” zavodida ishlab chiqariladi. Sotib olingan yangi vagonlardan 10 ta to‘rt vagonli poyezd tashkil etiladi.
Keltiriladigan poyezdda vagonlar orqali erkin harakatlanish mumkin. Bosh vagonlarda nogironlar aravachasi uchun joylar mavjud. Har bir yo‘lovchilar bo‘linmasi bekatni qidirish, yo‘nalishni rejalashtirish va yo‘l vaqtini hisoblash uchun interaktiv qidirish qobiliyatiga ega sensor ekranli axborot monitorlari bilan jihozlangan.
Yo‘lovchi salonlari va haydovchi kabinalari videokuzatuv, konditsioner va havoni zararsizlantirish tizimlari bilan jihozlangan. Metro vagonlari va romlarining ishlash muddati 30 yil. Haydovchilar kabinasining old oynasi, bir qismi yer yuzida harakatlanadigan Toshkent metrosining o‘ziga xos xususiyatlarini inobatga olgan holda, qo‘lda sozlanishi mumkin bo‘lgan quyosh nurlaridan himoya qiluvchi tizim bilan ta’minlanadi.
Ayni paytda Toshkent metropolitenida 2019-yilda sotib olingan 81-765.5 / 766.5 / 767.5 rusumli 5 ta “Metrovagonmash” poyezdi harakat qilmoqda. Xuddi shunday poyezdlar Moskva, Qozon va Boku metrolarida ham harakat qiladi.
Izoh (0)