Surxondaryo viloyati Sog‘liqni saqlash boshqarmasi maxsus va tez tibbiy yordam avtoxo‘jaligi tomonidan iyul oyida kamida beshta Damas-2 D13 (1, 2, 3, 4, 5) rusumidagi maxsus avtomashinalarini xarid qilish bo‘yicha shartnomalar imzoladi. Bunga Telegram’dagi “Davletovuz” kanali e’tibor qaratdi.
Ma’lum qilinishicha, har bir Damas budjetga 76 million 242 ming so‘mdan tushgan. Viloyat hokimi qarori bilan mahalliy budjetdan Termiz shahar hokimligiga xizmat mashinasini sotib olish uchun 245 million so‘m mablag‘ ajratilgan.
Eslatib o‘tamiz, sog‘liqni saqlash vazirining birinchi o‘rinbosari Amrillo Inoyatov 2020-yilning oxirida Damas rusumidagi avtomobillarni tibbiyot sohasi uchun xarid qilish to‘xtatilganini ma’lum qilgan edi.
Respublika shoshilinch tez tibbiy yordam ilmiy markazi bosh direktori Davron To‘laganov esa “shoshilinch tibbiy yordamni rivojlantirishning dolzarb vazifasi — Damas rusumli avtomashinalardan bosqichma-bosqich voz kechish hamda ularni B va S klassidagi tibbiy transport vositalariga almashtirish” ekanligini ta’kidlagan.
“Agar 2016-yilda tez yordam xizmati avtoulov parkining asosi Damas avtomobillaridan tashkil topgan bo‘lsa, hozirgi kunda tibbiy asbob-uskunalar bilan to‘liq jihozlangan B va S klassiga mansub reanimobillar soni 549 taga yetdi. Yaqin kunlarda barcha Damas avtomashinalari 1000 dona B klassiga mansub zamonaviy mashinalar sotib olinishi hisobiga almashtiriladi”, — degan edi To‘laganov.
Ma’lumot uchun, 2019-yil noyabr oyi ma’lumotlariga ko‘ra, mamlakatda 2500 ga yaqin tez tibbiy yordam mashinalari bo‘lib, ulardan 2217 tasi Damas avtomobillari edi. O‘sha vaqtda sog‘liqni saqlash vaziri o‘rinbosari (hozirda shu vazirlik rahbari) bo‘lgan Abduhakim Hojiboyev 2021-yilgacha Damas mikrovenlari bazasidagi barcha tez tibbiy yordam mashinalari zamonaviy reanimobillarga almashtirilishini ma’lum qilgan edi.
Eslatib o‘tamiz, 2021-yilning yanvarida ham Surxondaryoda tez yordam xizmatiga 20 ta Damas topshirilgandi.
Izoh (0)