Toshkent shahri Uchtepa tumanidagi sport saroyida COVID-19 bilan kasallangan bemorlarni davolash uchun zaxira markazi ochilmoqda. Bu haqda tuman hokimligi matbuot xizmati xabar qildi.
Ushbu zaxira markazi 100 o‘ringa mo‘ljallanib, u yetarlicha sovitkichlar, kislorod konsentratorlari, shifokor va hamshiralar bilan ta’minlanadi.
Undan tashqari tuman hududidagi Jahon tillari universiteti talabalar turar joyida ham 300 o‘ringa mo‘ljallangan zaxira markazi tayyorlanmoqda.
Avvalroq Toshkent shahrida DXX tasarrufidagi “Yoshlik” sport majmuasida, IIV tasarrufidagi “Universal” sport majmuasida 700 koyka-o‘ringa mo‘ljallangan kovid-markaz, “O‘zekspomarkaz”da 750 o‘rinli koronavirusga chalingan bemorlarni davolashga ixtisoslashgan markaz qaytadan tashkil etilgani to‘g‘risida xabar berilgandi.
Shuningdek, Samarqandda ham 1000 o‘rinli saralash va taqsimlash markazi o‘z faoliyatini qayta boshladi.
Eslatib o‘tamiz, 2020-yil noyabr oyining oxirlarida Atlas va “Yoshlik” koronavirusga ixtisoslashgan markazlari, 2020-yil 9-dekabr kuni esa “O‘zekspomarkaz”dagi kovid-markaz yopilgandi. O‘shanda kasallik dinamikasi oshganda yopilgan obyektlar tezkor ravishda qayta ochilishi ma’lum qilingandi.
Izoh (0)