Тошкент шаҳри Учтепа туманидаги спорт саройида COVID-19 билан касалланган беморларни даволаш учун захира маркази очилмоқда. Бу ҳақда туман ҳокимлиги матбуот хизмати хабар қилди.
Ушбу захира маркази 100 ўринга мўлжалланиб, у етарлича совиткичлар, кислород концентраторлари, шифокор ва ҳамширалар билан таъминланади.
Ундан ташқари туман ҳудудидаги Жаҳон тиллари университети талабалар турар жойида ҳам 300 ўринга мўлжалланган захира маркази тайёрланмоқда.
Аввалроқ Тошкент шаҳрида ДХХ тасарруфидаги «Ёшлик» спорт мажмуасида, ИИВ тасарруфидаги «Универсал» спорт мажмуасида 700 койка-ўринга мўлжалланган ковид-марказ, «Ўзэкспомарказ»да 750 ўринли коронавирусга чалинган беморларни даволашга ихтисослашган марказ қайтадан ташкил этилгани тўғрисида хабар берилганди.
Шунингдек, Самарқандда ҳам 1000 ўринли саралаш ва тақсимлаш маркази ўз фаолиятини қайта бошлади.
Эслатиб ўтамиз, 2020 йил ноябрь ойининг охирларида Аtlas ва «Ёшлик» коронавирусга ихтисослашган марказлари, 2020 йил 9 декабрь куни эса «Ўзэкспомарказ»даги ковид-марказ ёпилганди. Ўшанда касаллик динамикаси ошганда ёпилган объектлар тезкор равишда қайта очилиши маълум қилинганди.
Изоҳ (0)