Futbol bo‘yicha O‘zbekiston Superligasining 12-turi doirasida kechgan “Nasaf” — “So‘g‘diyona” uchrashuvida (1:0) har ikki jamoa vakillari o‘rtasida tortishuvga vaziyat yuzaga keldi.

Uchrashuv yakunlanishi arafasida mehmonlar “Nasaf” futbolchisiga nisbatan qo‘pol harakat qildi. Natijada bu ommaviy tortishuvga aylanib ketdi. Vaziyatga huquqni muhofaza qilish organlari xodimlari aralashdi va biroz muddatdan keyin holat yumshadi. Hakam videotakrorlar yordamida uch nafar futbolchiga qizil kartochka ko‘rsatdi. Janjal keltirib chiqargan Jamshid Boltaboyev (“So‘g‘diyona”) va Sherzod Nasrullayev (“Nasaf”) to‘g‘ridan to‘g‘ri qizil kartochkaga loyiq ko‘rilgan bo‘lsa, Husniddin Aliqulov (“Nasaf”) ikkinchi ogohlantirishni olib chetlatildi.

Qayd etish kerak, bosh hakam Shavkat Nasibullayev bu vaziyatdan sal avval “So‘g‘diyona”ning golini bekor qilgandi. Hakam videotakrorlardan keyin hujum vaqtida qoida buzilishi yuzaga kelganini qayd etdi va golni inobatga olmagandi.

Eslatib o‘tamiz, Shavkat Nasibullayev 2020-yilning dekabr oyida “Neftchi” va “Turon” o‘rtasidagi Pro-Liganing so‘nggi tur o‘yinida faoliyat olib borgandi. Bu uchrashuv so‘ngida hakamlarga nisbatan “Neftchi” futbolchilari va muxlislari tomonidan tajovuzkor harakatlar amalga oshirilgandi. Natijada bir nechta kishiga jinoiy ish qo‘zg‘atilgan, Nasibullayevga oyoq bilan zarba bergan Jamshid To‘raqulov 10 yilga futbolga oid har qanday faoliyatdan chetlatilgan, “Neftchi” esa 100 million so‘m jarimaga tortilgandi.

Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!