Шавкат Мирзиёев раислигида 1 июль куни давлат активларини хусусийлаштириш соҳасидаги ишлар натижадорлиги ва келгусидаги устувор вазифалар муҳокамаси юзасидан видеоселектор йиғилиши ўтказилди, дея хабар бермоқда Президент матбуот хизмати.
Йиғилиш давомида Тошкент шаҳридаги 13 та йирик кўчмас объекти ҳамда 11 та тармоқ корхонасидаги давлат улушларини хорижий консултантларни жалб қилган ҳолда, сотувга чиқариш зарурлиги таъкидланди.
Вилоят, туман ва шаҳар ҳокимларига ўз ваколатидаги 154 та бўш турган объектни бир ой муддатда савдога чиқариш вазифаси қўйилди.
Ҳокимликлар томонидан сотувга чиқарилган мулклар сотилганда, ҳудудлар ихтиёрида қоладиган маблағлар улуши 73 фоиздан 87 фоизга ошириладиган бўлди. Бу маблағлар вилоят ва туманлар (шаҳар) бюджетлари ўртасида тенг тақсимланади.
Бундан аввал Coca-Cola Uzbekistan’даги давлат улуши сотилишининг учинчи босқичи якунлангани, «Оҳангаронцемент»нинг 84,19 фоиз улуши Кипр компанияси ихтиёрига ўтгани ҳамда Тимур Ишметов 2021 йил якунигача Ўзбекистондаги яна бир йирик банк хусусийлаштирилишини айтгани ҳақида хабар берилганди.
Изоҳ (0)