28-iyun kuni Toshkentning Alisher Navoiy nomidagi Davlat akademik Katta teatri old maydonida har yili an’anaviy tarzda o‘tkazib kelinayotgan “Tahsin” milliy mukofoti g‘oliblarini taqdirlash marosimi bo‘lib o‘tdi.
O‘zbekiston Respublikasi Yoshlar ishlari agentligi tomonidan ta’sis etilgan mukofotni topshirish marosimida vazirlik, idora va tashkilotlar tomonidan 28 ta nominatsiya bo‘yicha 500 nafardan ortiq nomzodlar tavsiya etilgan. Ular ichidan O‘zbekiston taraqqiyoti yo‘lida ko‘rsatgan xizmatlari, faolliklari va munosib mehnatlari bilan namuna bo‘lgan g‘oliblar saralab olindi va ularga “Tahsin” mukofoti topshirildi.
Mukofotlanganlar qatorida “Daryo” internet nashri muxbirlari Mirolim Isajonov va Musulmonbek Ibrohimov ham bor. 2019-yilda ushbu mukofotni “Daryo” fotomuxbiri Madina Nurman qo‘lga kiritgandi.
Eslatib o‘tamiz, Prezidentning “Matbuot va ommaviy axborot vositalari xodimlari kuni munosabati bilan soha xodimlaridan bir guruhini mukofotlash to‘g‘risida”gi farmoni bilan Mirolim Isajonov “Kelajak bunyodkori” medali bilan ham mukofotlangandi.
“Daryo” muxbiri Xonzodabegim A’zamova esa “Yilning eng faol jurnalisti” sifatida e’tirof etilganlar safidan o‘rin oldi.
Izoh (0)