Юссуф Поульсен Дания терма жамоаси каби Евро—2020 да ёрқин ўйин намойиш этмоқда.
У орқасида Поульсен деб ёзилган футболкалари билан Еврода қатнашмаяпти. Юссуфнинг футболкасида Юрари фамилияси ёзилган.
Футболчининг тўлиқ исми — Юссуф Юрари Поульсен. Унинг отаси танзаниялик Шихе Юрари (онаси даниялик) Дания ва Африка ўртасида қатнайдиган контейнер кемасида ишлаган. Юссуф 6 ёшга кирганда отаси саратон касаллиги туфайли вафот этади.
«Бу мен ва оилам учун оғир мусибат эди. Биз энди отамсиз яшашни ўрганишга мажбур эдик. Юрари фамилияси туширилган футболкада ўтказилган терма жамоа учун ҳар бир ўйин мени отам билан боғлаб туради. Футболга у туфайли кириб келганман. Отам ҳам футбол ўйнарди, фақат ҳаваскор сифатида», — дея хотирлайди Юссуф.
Поульсен дастлаб онасининг фамилияси туширилган футболкада майдонга тушарди, кейинчалик терма жамоада Юрари номи остида тўп тепадиган бўлди. Бу эса унинг Поульсен фамилияли бошқа даниялик футболчилардан ажралиб туришини таъминлади.
Юссуф доим Юрари фамилияси ёзилган футболкада ўйнамоқчи бўлган, лекин «Лейпциг» ва Рангник барчасини о‘згартириб юборган
Болалик вақтларида ҳаттоки Юссуфнинг ўзи ҳам унда иқтидор йўқлиги ишониб қоларди. Бошқалар ҳам унда ажралиб турадиган аниқ бир хислатни кўрмасди. Масалан, Даниянинг «Люнгбу» жамоасида Юссуф билан бирга ўйнаган шериги оддий тўп узатилганда, тўп Поульсендан 3 метр узоқдан ўтиб кетарди, деб хотирлайди.
«Лейпциг»га ўтгандан кейин барчаси ўзгариб кетди. Ўшанда жамоа учинчи лигада ўйнарди. Мураббийлар даниялик футболчига эътиборини қаратди. Жамоага мослашиб кетишига Йозуа Киммих ёрдамлашди. Иккаласи ётоқхонада бирга яшарди. Юссуф «Лейпциг»нинг қуйи дивизиондан Чемпионлар Лигасига қадар бўлган йўлида бирга бўлган икки футболчидан бири (иккинчиси — Доминик Кайзер).
Юссуф Юрари фамилияси билан футбол ўйнашни хоҳларди. Лекин вазият бошқача тус олади. «Жамоа билан музокара ўтказаётганда отамнинг фамилиясида тўп суриш истагида эканимни айтдим, лекин шартнома имзолашга келганимда футболкаларнинг орқасида Поульсен фамилияси туширилганини кўрдим. 19 ёш бўлганман, футболкадаги исмни қайтадан алмаштириб чиқаришларини талаб қилолмасдим», — дейди «Лейпциг»га энди келган вақтларини эслаб Юссуф.
Поульсен Бундеслиганинг иккинчи дивизионида «Лейпциг» тўпурари бўлган вақтда терма жамоадан чақирув олади. Чемпионлар Лигасида эса аввалроқ ўйнаши мумкин эди. Мёнхенгладбахнинг «Боруссия»си футболчига таклиф билан чиқади. Аммо Юссуф «Лейпциг»га ишонарди. Жамоа Бундеслигага чиққач Ралф Ҳазенҳюттл қўл остида ишлар юришмади. Кейин эса жамоага янги келган Ралф Рангник унинг фаолиятида бурилиш қилиб юборди.
Поульсен отаси туғилган Танзанияга тез-тез бориб туради. Лекин Африка давлати эмас, Дания терма жамоаси шарафини ҳимоя қилади.
Юссуф Дания билан бирга ЖЧ—2018 га борди. 80 йилдан кейин биринчи марта терма жамоанинг кетма-кет икки ўйинида пенальти ишлаган илк футболчига айланди. Перуга қарши ўйинда эса ғалаба голини урди. Дания Россиядаги мундиалда нимчорак финалгача борди ва пенальтилар сериясида Хорватияга мағлуб бўлди.
Евро—2020 да ҳам Бельгия ва Россияга қарши ўйинларда Поульсен ўз ҳисобига гол ёздириб қўйди.
B гуруҳидан ўрин олган Дания терма жамоаси 2-ўрин билан плей-офф босқичига йўл олди. Каспер Юлманн шогирдлари Финляндия ва Бельгияга мағлуб бўлди, Россия устидан қозонилган ғалабадан сўнг 3 очко тўплаган ҳолда (тўплар нисбати данияликларда яхшироқ) 2-ўринни эгаллади. Плей-оффда данияликлар Уэльс устидан 4:0 ҳисобида ғалаба қозонди ва чорак финалга йўл олди. 3 июль куни чорак финалда Дания Чехияга қарши баҳс олиб боради. Юрарининг Евродаги саёҳати давом этиш ёки этмаслиги айнан шу ўйинга боғлиқ.
Изоҳ (0)