Qashqadaryo viloyati maxsus komissiyasining 28-iyun kuni o‘tkazilgan yig‘ilishida vohadagi koronavirus bilan bog‘liq vaziyat va Respublika maxsus komissiyasining qabul qilingan qarorini joriy etish masalalari ko‘rib chiqildi, deb xabar bermoqda viloyat hokimligi matbuot xizmati.
Xabarga ko‘ra, muhokamada 26-iyun kuni viloyat rahbarining voha ahliga yo‘llagan murojaati yuzasidan aholi tomonidan qoldirilgan izohlarga ham e’tibor qaratildi.
“300 nafardan ziyod fuqarolarimiz murojaatim yuzasidan takliflar bilan chiqdi. Odamlarimiz to‘ylar hali ham 300-400 kishilik o‘tayotganidan xavotirda. Shuningdek, viloyatdagi iqlimni hisobga olib, ovqatlanish obyektlarining ish vaqtini soat 22:00-23:00 ga qadar uzaytirish taklifi ham ko‘p tushdi. Vohadoshlarimiz takliflarini inobatga olib, umumiy ovqatlanish obyektlari — kafe, oshxona, choyxonalarning ishlashiga soat 08:00 dan 22:00 gacha ruxsat berilishini taklif qilaman”, — degan Zoir Mirzayev.
Eslatib o‘tamiz, O‘zbekistonda 28-iyundan ko‘ngilochar va ovqatlanish obyektlari faoliyatiga cheklovlar o‘rnatildi. Unga ko‘ra, Respublika bo‘ylab ko‘ngilochar obyektlar — restoran, tungi klublar, diskoteka, karaoke, bilyard zallari va kompyuter o‘yinlari markazlari hamda umumiy ovqatlanish obyektlari — kafe, oshxona, choyxonalarning ishlashiga soat 08:00 dan 20:00 gacha ruxsat berildi.
Shuningdek, ko‘ngilochar va umumiy ovqatlanish obyektlarida tashrif buyuruvchilarga ushbu muassasalar umumiy sig‘imining 50 foizidan qat’iy oshirmagan holda xizmat ko‘rsatish belgilandi.
Izoh (0)