O‘zbekiston Xalq ta’limi vazirligi maktabning 9-sinf bitiruvchilariga nima sababdan shahodatnomalarning nusxasi berilayotgani haqidagi savolga javob berdi.
— Nima sababdan 9-sinf bitiruvchilariga shahodatnomalarning originali (asli) emas, uning nusxasi berilyapti? 11-sinfni bitirganidan keyin attestatlarning originali beriladimi?
— O‘zbekistonda 11 yillik majburiy ta’lim joriy etilgani sababli aksariyat 9-sinf o‘quvchilari ta’limni o‘z maktabida davom ettiradi, ularning shahodatnomalarining originali ham maktabda saqlanadi. Agar 9-sinfdan keyin o‘quvchi boshqa maktabga yoki akademik litseyga o‘qishga qabul qilinsa, ushbu o‘qishga kirgan ta’lim muassasasi tomonidan berilgan ma’lumotnoma (talon) asosida shahodatnomaning original nusxasi berib yuboriladi. Bu masalada ota-onalar maktab direktoriga murojaat etishlari mumkin.
11 yillik majburiy ta’limni tamomlaganidan so‘ng esa ularga attestatlari tantanali ravishda topshiriladi, — deyiladi vazirlik javobida.
Bundan avval O‘zbekistonda 1-sinfga onlayn qabul tizimi ishga tushirilgani hamda O‘zbekiston maktablarida yakuniy imtihonlardan o‘tolmagan o‘quvchilar ikki hafta o‘tgach qayta topshirishi mumkinligi, shunda ham o‘ta olmasa, sinfdan qoldirilishi haqida xabar berilgandi.
Izoh (0)