“Reanimatsiya bo‘limlari deyarli to‘lgan”. So‘nggi kunlarda Zangiotadagi shifoxonaga murojaatlar soni ikki barobarga oshgani ma’lum qilindi

Toshkent viloyatining Zangiota tumanida joylashgan 1 va 2-yuqumli kasalliklar shifoxonasiga bo‘layotgan murojaatlar so‘nggi kunlarda ikki barobarga oshdi. Bu haqda “O‘zbekiston 24” telekanali tomonidan tayyorlangan lavhada ma’lum qilindi.

Efirga uzatilgan lavhada muassasadagi bemorlarning ko‘pchiligi soha mutaxassislarining ogohlantirishlariga qaramay, karantin talablariga rioya qilmagani, o‘zi va yaqinlari salomatligiga e’tiborsiz bo‘lgani, kasallikka qarshi emlanishdan bosh tortgani, natijada aksariyati og‘ir havolga tushib qolganini ko‘rish mumkin.

“Reanimatsiya bo‘limida 36 ta o‘rin mavjud bo‘lib, hozirda ularning 34 tasi band. Bu og‘ir va o‘ta og‘ir kasallar ko‘payganidan dadolat beradi. Hozirgi kunda ikkita bo‘sh o‘rnini o‘ta og‘ir bemorlar uchun zaxirada ushlab turibmiz”, — deydi Zangiotadagi 2-yuqumli kasalliklar shifoxonasi reanimatsiya bo‘limi mudiri Ahtam Qoryog‘diyev.

Ta’kidlanishicha, jonlantirish bo‘limida yotganlarning aksariyatini koronavirusga qarshi emlanmagan fuqarolar tashkil etmoqda.

2-Zangiota ixtisoslashtirilgan yuqimli kasalliklar shifoxonasi direktori Doniyor Mirazimovning so‘zlariga ko‘ra, oxirgi uch-to‘rt kun ichida murojaatlar soni ikki barobarga oshgan. Ular orasida shifoxonaga yotqizilayotganlar 1,5 baravarga, kasallarning 13 foizi og‘ir holatda olib kelinib, reanimatsiyaga yotqizilmoqda. Bemorlarning aksariyatining yoshi 65 dan o‘tgan va surunkali kasalligi bor fuqarolar tashkil etmoqda.

“Ko‘p kasallarda vaksinatsiya qilishga imkoniyati bo‘lgan, lekin ular har xil sabablarga ko‘ra emlanishni rad etgan… Epidemiologik rejimni hech kim saqlamayapti, ommaviy tadbirlar, to‘y, yubileylar ko‘paygan. Bularning hammasi, albatta, koronavirus ko‘payishiga sabab bo‘ladi”, — deydi Mirazimov.

Eslatib o‘tamiz, may boshlarida Zangiota tumanidagi 2-son yuqumli kasalliklar shifoxonasidagi ikkinchi reanimatsiya bo‘limi boshlig‘i Begali Hakimov “Daryo”ga bergan intervyusida reanimatsiya sharoitida hammani saqlab qolishning imkoni yo‘qligini aytgandi. “Biroq to‘g‘risini aytish kerak, reanimatsiya sharoitida hammani tirik saqlab qolib bo‘lmaydi. O‘ta og‘ir ahvolda kelgan bemorlarimizning har to‘rttasidan birini saqlab qololganimiz ham katta gap”, — deya ta’kidlagandi shifokor.

Sog‘liqni saqlash vazirligi ma’lumotlariga ko‘ra, O‘zbekistonda 20-iyun kuni yana 427 kishida koronavirus tasdiqlanib, mamlakatda ushbu virusga chalingani rasman tan olinganlar soni 106 452 nafarga yetgan.