IIV YHXBB axborot xizmati ijtimoiy tarmoqlarda “GAI xodimi tez tibbiy yordam avtomobilini sababsiz o‘tkazmasligi — jinoyat” sarlavhasi ostida tarqalgan video yuzasidan ma’lumot berdi.
Ijtimoiy tarmoqlarda tarqalgan videoda YPX xodimi yo‘lning harakatlanish vaqtincha cheklangan qismida chaqiruv bo‘yicha manzilgan ketayotgan tez yordam mashinasini o‘tkazmagani tasvirlangan. Holat Termiz shahar Navbahor ko‘chasida sodir bo‘lgan.
Ma’lum qilinishicha, 15—17-iyun kunlari Surxondaryo viloyatida “Yoshlar festivali” o‘tkazilgani munosabati bilan YPX xodimlari xizmatga jalb etilib, ayrim ko‘chalarda transport vositalari harakati cheklangan.
“Hozirda holat yuzasidan Surxondaryo viloyati IIB YHXB mas’ullari tomonidan surishtiruv harakatlari olib borilmoqda”, — deyiladi xabarda.
Avvalroq Surxondaryoda 1 mln so‘m pora olmagan YPX inspektori televizor bilan mukofotlangani, Angrenda kuniga 50 ta bayonnoma yozishi aytilgan YPX xodimiga nisbatan xizmat tekshiruvi tayinlangani to‘g‘risida xabar berilgandi.
Izoh (0)