Qoraqalpog‘istonda pullarini qimorga yutqazgan fuqaro yolg‘on ko‘rsatma ortiga yashirinmoqchi bo‘ldi, deb xabar bermoqda IIV matbuot xizmati.
Ma’lum qilinishicha, 7-iyun kuni Qoraqalpog‘istonning To‘rtko‘l tumanida yashovchi fuqaro O.S. ichki ishlar organlariga shikoyat bilan murojaat qilib, tumanning Bog‘yop kanal yoqasida uning hamyoni va ichida bo‘lgan 2100 dollar hamda 3,5 million so‘m pullari noma’lum shaxslar tomonidan o‘g‘irlab ketilganini aytgan.
Holat yuzasidan To‘rtko‘l tumani IIB tomonidan Jinoyat kodeksining 169-moddasi (o‘g‘irlik) bilan jinoyat ishi qo‘zg‘atilgan.
Surishtiruv jarayonida jabrlanuvchining ko‘rsatmalari va tezkor-tergov tadbirlari jarayonida olingan ma’lumotlarda jiddiy tafovutlar mavjudligi sababli fuqaro O.S.ning hayot tarzi o‘rganilib, uni o‘g‘irlik haqida yolg‘on ko‘rsatmalar bergani aniqlangan.
Keltirilgan dalil va isbotlarning ta’siri ostida u jinoyat haqida yolg‘on ma’lumot berganini tan olgan va 2021-yilning may—iyun oylari davomida 2100 dollar hamda 3,5 million so‘m pullarini qimor va tavakkalchilikka asoslangan 1XBET bukmekerlik o‘yiniga tikib yutqizib qo‘yganini ma’lum qilgan.
Hozirda O.S.ga nisbatan Jinoyat kodeksining 237-moddasi (yolg‘on xabar berish) bilan jinoyat ishi qo‘zg‘atilib, tergov harakatlari olib borilmoqda.
Eslatib o‘tamiz, O‘zbekiston Prezidentining “O‘zbekistonda futbolni rivojlantirishni mutlaqo yangi bosqichga olib chiqish chora-tadbirlari to‘g‘risida”gi farmoni bilan 2021-yil 1-yanvardan boshlab xalqaro tajribadan kelib chiqib sport sohasini, ayniqsa, futbolni yanada rivojlantirish, uning investitsiyaviy jozibadorligini oshirish, qo‘shimcha mablag‘larni jalb qilish maqsadida O‘zbekistonda bukmekerlik faoliyatini amalga oshirishga ruxsat berilgan.
Izoh (0)