Surxondaryoda xizmat vazifasini bajarish jarayonida pora olmagan viloyat IIB YHXB YPX inspektori taqdirlandi. Bu haqda YHXBB matbuot xizmati xabar berdi.
Ma’lum qilinishicha, 11-iyun kuni Jarqo‘rg‘on tumanida kundalik xizmat vazifasini bajarish jarayonida “Gaz-53” avtomobilining haydovchisi qoidabuzarlik yuzasidan chora ko‘rilmasligi evaziga O‘.Berdiyevga 1 million so‘m miqdoridagi pulni pora tariqasida taklif qilgan.
Xodim tomonidan bildirgi orqali viloyat IIB boshlig‘i nomiga ma’lum qilinib, pora berishga uringan haydovchi qo‘lga olingan.
“Xodimning xizmat faoliyatidagi sadoqati va mas’uliyatliligi inobatga olinib, IIV YHXBB boshlig‘i va viloyat IIB rahbariyatining minnatdorchiligi bildirilib va qimmatbaho sovg‘a topshirildi”, — deyiladi xabarda.
Bundan avval Buxoroda 500 dollar pora olmagan IIB xodimi 10 million so‘m bilan mukofotlangani, Samarqandda 2 ming dollar pora olmagan IIB xodimiga 15 million so‘m mukofot puli berilgani, Toshkent viloyatida 1000 dollar porani olmagan kadastr xodimiga 10 million so‘m pul va sihatgohga 2 kishilik yo‘llanma berilgani haqida xabar berilgandi.
Izoh (0)