Қорақалпоғистонда пулларини қиморга ютқазган фуқаро ёлғон кўрсатма ортига яширинмоқчи бўлди, деб хабар бермоқда ИИВ матбуот хизмати.
Маълум қилинишича, 7 июнь куни Қорақалпоғистоннинг Тўрткўл туманида яшовчи фуқаро О.С. ички ишлар органларига шикоят билан мурожаат қилиб, туманнинг Боғёп канал ёқасида унинг ҳамёни ва ичида бўлган 2100 доллар ҳамда 3,5 миллион сўм пуллари номаълум шахслар томонидан ўғирлаб кетилганини айтган.
Ҳолат юзасидан Тўрткўл тумани ИИБ томонидан Жиноят кодексининг 169-моддаси (ўғирлик) билан жиноят иши қўзғатилган.
Суриштирув жараёнида жабрланувчининг кўрсатмалари ва тезкор-тергов тадбирлари жараёнида олинган маълумотларда жиддий тафовутлар мавжудлиги сабабли фуқаро О.С.нинг ҳаёт тарзи ўрганилиб, уни ўғирлик ҳақида ёлғон кўрсатмалар бергани аниқланган.
Келтирилган далил ва исботларнинг таъсири остида у жиноят ҳақида ёлғон маълумот берганини тан олган ва 2021 йилнинг май—июнь ойлари давомида 2100 доллар ҳамда 3,5 миллион сўм пулларини қимор ва таваккалчиликка асосланган 1ХBET букмекерлик ўйинига тикиб ютқизиб қўйганини маълум қилган.
Ҳозирда О.С.га нисбатан Жиноят кодексининг 237-моддаси (ёлғон хабар бериш) билан жиноят иши қўзғатилиб, тергов ҳаракатлари олиб борилмоқда.
Эслатиб ўтамиз, Ўзбекистон Президентининг «Ўзбекистонда футболни ривожлантиришни мутлақо янги босқичга олиб чиқиш чора-тадбирлари тўғрисида»ги фармони билан 2021 йил 1 январдан бошлаб халқаро тажрибадан келиб чиқиб спорт соҳасини, айниқса, футболни янада ривожлантириш, унинг инвестициявий жозибадорлигини ошириш, қўшимча маблағларни жалб қилиш мақсадида Ўзбекистонда букмекерлик фаолиятини амалга оширишга рухсат берилган.
Изоҳ (0)