Prezident Shavkat Mirziyoyev Andijon faollari bilan o‘tkazilayotgan yig‘ilishda viloyatda gulchilikni rivojlantirishga alohida e’tibor berish kerakligini qayd etib o‘tdi, deb xabar beradi “Daryo” muxbiri.

Foto: Prezident matbuot xizmati

Davlat rahbarining so‘zlariga ko‘ra, Andijondagi 27 ta mahallada 5 mingga yaqin xonadon tomorqasida gul yetishtirish yo‘lga qo‘yilib, kamida 10 ming nafar aholi bandligini ta’minlanish zarur.

Ta’kidlanishicha, Andijon, Izboskan, Oltinko‘l tumanlarida klaster usulida gulchilik rivojlantiriladi. Jumladan, Andijon tumanidagi “Andijon gullar bog‘i” korxonasini klasterga aylantirib, 30 gektar yerda gul va manzarali ko‘chatlar yetishtiriladigan bog‘ barpo etish kerak.

“Husanov, Abdurahmonov 1-oktabrga qadar Shahrixon tumanida aholini kasb-hunarga o‘qitish markazi qoshida gulchilik maktabini tashkil etib, chet eldan malakali mutaxassislarni jalb etadi. Shuningdek, viloyatda gulchilik sohasidagi tajribali tadbirkorlarni jalb etib, har biri 2 sotixdan iborat 20 ta issiqxona qurgan holda ularda o‘quv-amaliyotlarini tashkil etishi kerak.

Gulchilik daromad manbai bo‘lishi bilan birga, xonadonimizning ham, ko‘nglimizning ham yanada obod va go‘zal bo‘lishiga xizmat qiladi. Shuning uchun gulchilik bo‘yicha ham Andijon tajribasini yaratish kerak”, — deydi Prezident.

Avvalroq Shavkat Mirziyoyev Andijonga tashrifini Izboskandagi to‘qimachilik korxonasini borib ko‘rishdan boshlagani, Andijonda metall konstruksiyalar korxonasi tashkil etishga ko‘rsatma bergani hamda Izboskan tumanidagi “Rustamjon Zamin rivoji” fermer xo‘jaligi dalasida g‘alla hosilini ko‘rgani haqida xabar berilgandi.

Eslatib o‘tamiz, 2019-yilda Andijon shahridagi Alisher Navoiy nomidagi madaniyat va istirohat bog‘ida “Andijonni ko‘rkam va obod viloyatga aylantiraylik!” shiori ostida o‘tkazilgan ko‘rik-tanlov yakunlariga bag‘ishlangan gullar bayrami bo‘lib o‘tgan edi.