Olmaliqda uysiz hayvonlarni ushlash xizmati xodimi itni ohakka botirib, mayib qildi, deya xabar bermoqda “Mehr va Oqibat” hayvonlarni himoya qilish jamiyati.
Foto: “Mehr va Oqibat”
Qayd etilishicha, aprel oyida “Mehr va Oqibat” jamiyati rahbari nafaqaxo‘r ayoldan ariza qabul qilgan. Arizada yozilishicha, ayol tasodifan Olmaliq shahridagi uysiz hayvonlarni ushlash xizmati hududida itga nisbatan shafqatsiz munosabatda bo‘linayotgani guvohiga aylangan.
Guvohning so‘zlariga ko‘ra, u katta metall quvurda it ohak bilan qoplanib yotganini ko‘rgan. Shuningdek, ushbu vaqtda itning og‘izdan qon oqayotgan bo‘lgan.
Ayolning so‘zlariga ko‘ra, avvaliga ko‘ngillilar jonivorni ohak bilan qoplangan holda xonadan olib chiqqan. Shundan so‘ng “Mehr va Oqibat” vakillari zudlik bilan huquqni muhofaza qilish idoralariga xat yuborgan.
Itga shafqatsiz muomalada bo‘lgan uysiz hayvonlarni ushlash xizmati xodimining sudi 14-iyun kuni bo‘lib o‘tdi. Sud qarori bilan unga BHMning 0,5 (122 500 so‘m) miqdorida jarima belgilangan.
“Hayvonlarni himoya qilish tashkiloti bunday ‘yumshoq’ qarordan hafsalasi pir bo‘ldi. Chunki Ma’muriy javobgarlik to‘g‘risidagi kodeksning 111-moddasida hayvonlarga nisbatan shafqatsiz munosabatda bo‘lish ularning o‘limiga yoxud mayib bo‘lishiga olib kelsa, BHMning bir baravaridan uch baravarigacha miqdorda jarima solinishi belgilab qo‘yilgan”, — deyiladi hayvon himoyachilari xabarida.
Hozirda ko‘ngillilar jarohat olgan itga g‘amxo‘rlik qilmoqda.
Bundan avval Angrenda itlarga nisbatan shafqatsiz munosabatda bo‘lgan uysiz hayvonlarni ushlash xizmati xodimlari jazolangani, Buxoroda itni yeyish uchun o‘ldirib, boshini bolalar bog‘chasiga tashlab ketgan shaxsga chora ko‘rilgani hamda Namanganda voyaga yetmaganlar tovuqlarga zarar yetkazgan itni daraxtga osib qo‘ygani haqida xabar berilgandi.
