Ijtimoiy tarmoqda “Termizda YPX xodimi qoidani buzdi” sarlavhasi ostidagi xabar tarqaldi. IIV YHXBB matbuot xizmati bu haqda rasmiy ma’lumot berdi.

Foto: YXHBB matbuot xizmati

Xabarda keltirilgan fotosuratda Termiz shahrida YHXBga tegishli bo‘lgan Mercedes-Benz rusumli 75 204 VSF davlat raqam belgili maxsus xizmat avtomobili haydovchisi yo‘l harakati qoidalariga zid ravishda yo‘l yotiq chizig‘ini bosib harakatlangani aks etgan.

Holat o‘rganilib, Mercedes-Benz rusumli maxsus xizmat avtomobili biriktirilgan haydovchi xodimga nisbatan belgilangan tartibda bayonnoma tuzilgan va Ma’muriy javobgarlik to‘g‘risidagi kodeksning 128-moddasi (haydovchilarning transport vositalarini piyodalar yo‘lkalaridan yurgizishi, yo‘l belgilari va yo‘l harakatining boshqa qoidalari talablariga rioya etmasligi) 1-qismini qo‘llagan holda 15-iyun kuni 122 500 so‘m jarimaga tortilgan.

Eslatib o‘tamiz, 2020-yilning noyabrida va 2021-yilning boshlarida ham Termizda xizmat mashinasida yo‘l qoidasini buzgan YPX xodimi jarimaga tortilgandi.