YHXBB axborot xizmati 2020-yilning 24-noyabr kuni ijtimoiy tarmoqda “Kun fotosi: 75 003 VSF, 75 007 VSF! Qonun faqat oddiy fuqaroga ishlaydi, ijro etuvchilarga ta’sir qilmaydi!” sarlavhasi ostidagi tarqalgan videoga munosabat bildirdi.

Kadr: Telegram / @YHXBB

Boshqarma xabariga ko‘ra, videolavha o‘rganilgan va davlat raqami 75 007 VSF bo‘lgan Lacetti hamda 75 003 VSF davlat raqam belgili Captiva haydovchilariga nisbatan yo‘l harakati qoidalarining 91-bandi talablarini buzganlik bo‘yicha belgilangan tartibda chora ko‘rilgan.

Telegram kanaliga yuklangan xabar ostiga ikkala haydovchiga nisbatan rasmiylashtirilgan bayonnoma suratlari ilova qilingan.

Foto: Telegram / @YHXBB

Foto: Telegram / @YHXBB

“Barcha haydovchilardan yo‘l harakati qoidalariga amala qilishlarini so‘raymiz. Jamoatchilik nazorati rivojlanishida o‘z hissasini qo‘shib borayotgan fuqarolarga minnatdorlik bildiramiz”, – deyiladi YHXBB axborot xizmatining xabarida.

Iyul oyida qashqadaryolik sinchkov haydovchi YPX inspektorini jarima to‘lashga majbur qilgani haqida xabar berilgan, shuningdek, “plan”ni to‘ldirish uchun kuniga 5 tadan bayonnoma tuzishga topshiriq bergan Olmazor IIB podpolkovnigiga nisbatan xizmat tekshiruvi belgilangandi.