Xalqaro ekspeditsiya aprel—may oylari davomida Qoraqalpog‘istondagi tarixiy-madaniy obyektlar qiymatini o‘rganib, ularni YuNESKO butunjahon madaniy merosi ro‘yxatiga kiritish strategiyasi ishlab chiqdi, deb xabar beradi “Gazeta.uz”.
Ekspeditsiyaga YuNESKO bo‘yicha Milliy komissiya, Qoraqalpog‘iston Madaniyat vazirligi va tumanlar hokimliklari yordam bergan.
Ekspertlar guruhi tarkibidan arxeologiya, arxitektura, tarix va madaniy yorgorliklarni hujjatlashtirish borasidagi mahalliy hamda xorijiy mutaxassislar o‘rin olgan. Ekspeditsiya Markaziy Osiyo xalqaro tadqiqot instituti rahbarligida hamda London universiteti kolleji qo‘llab-quvvatlovi ostida “Markaziy Osiyo arxeologik landshaftlar” loyihasi doirasida o‘tkazilgan.
Ma’lumotlarni yig‘ishda mutaxassislar uchta uchuvchisiz boshqariladigan uchish apparatidan foydalangan. To‘rtta ixtisoslashgan guruh 8 ming kilometrdan ortiq yo‘l bosgan. Tadqiqot natijasida mintaqadagi 53 ta yodgorlik bo‘yicha materiallar olingan, 67 mingdan ortiq aerosurat va 144 ta video olingan.
Tadqiqot natijasida har bir yodgorlikning batafsil aerosuratga olish va uch o‘lchamli modeli yaratiladi, buning asosida tabiiy, me’moriy, infratuzilma, maishiy va boshqa elementlar aniqlanadi.
Mutaxassislar tomonidan ishlab chiqilgan tavsiyalar O‘zbekiston tarixi va madaniyatining noyob obyektlarini saqlab qolish bo‘yicha global strategiyani hamda ularni YuNESKO ro‘yxatiga kiritish dasturini shakllantirishga yordam beradi.
Avvalroq Shahrisabz YuNESKO ro‘yxatidan chiqmaydigan bo‘lgani to‘g‘risida xabar berilgandi.
Izoh (0)