Халқаро экспедиция апрель—май ойлари давомида Қорақалпоғистондаги тарихий-маданий объектлар қийматини ўрганиб, уларни ЮНЕСКО бутунжаҳон маданий мероси рўйхатига киритиш стратегияси ишлаб чиқди, деб хабар беради «Gazeta.uz».
Экспедицияга ЮНЕСКО бўйича Миллий комиссия, Қорақалпоғистон Маданият вазирлиги ва туманлар ҳокимликлари ёрдам берган.
Экспертлар гуруҳи таркибидан археология, архитектура, тарих ва маданий ёргорликларни ҳужжатлаштириш борасидаги маҳаллий ҳамда хорижий мутахассислар ўрин олган. Экспедиция Марказий Осиё халқаро тадқиқот институти раҳбарлигида ҳамда Лондон университети коллежи қўллаб-қувватлови остида «Марказий Осиё археологик ландшафтлар» лойиҳаси доирасида ўтказилган.
Маълумотларни йиғишда мутахассислар учта учувчисиз бошқариладиган учиш аппаратидан фойдаланган. Тўртта ихтисослашган гуруҳ 8 минг километрдан ортиқ йўл босган. Тадқиқот натижасида минтақадаги 53 та ёдгорлик бўйича материаллар олинган, 67 мингдан ортиқ аэросурат ва 144 та видео олинган.
Тадқиқот натижасида ҳар бир ёдгорликнинг батафсил аэросуратга олиш ва уч ўлчамли модели яратилади, бунинг асосида табиий, меъморий, инфратузилма, маиший ва бошқа элементлар аниқланади.
Мутахассислар томонидан ишлаб чиқилган тавсиялар Ўзбекистон тарихи ва маданиятининг ноёб объектларини сақлаб қолиш бўйича глобал стратегияни ҳамда уларни ЮНЕСКО рўйхатига киритиш дастурини шакллантиришга ёрдам беради.
Аввалроқ Шаҳрисабз ЮНЕСКО рўйхатидан чиқмайдиган бўлгани тўғрисида хабар берилганди.
Изоҳ (0)