O‘zbekistonda 24-may, dushanba kuni yuz bergan beshta yo‘l-transport hodisasi oqibatida jami 15 kishi halok bo‘ldi. Qayd etish joiz, bunda faqat IIV, YHXBB va uning hududiy bo‘linmalari tomonidan o‘tgan hafta — 24—30-may sanalari oralig‘ida e’lon qilingan hodisalar va raqamlar inobatga olingan. Aslida aynan bir kunda yuz bergan YTHlar va ulardagi qurbonlar soni ko‘proq bo‘lishi ham mumkin.

Angrenda yuz bergan va kamida yetti kishining o‘limiga sabab bo‘lgan YTH.

Foto: “Daryo”

Jumladan,

  • Surxondaryoning Sho‘rchi tumanida soat taxminan 02:15 da “Kamaz” va Damas ishtirokidagi YTH oqibatida Damas haydovchisi va uning yonida bo‘lgan yo‘lovchi halok bo‘lgan, shuningdek, Damas’ning ikki yo‘lovchisi (jumladan, 2-sinfda o‘qiydigan qiz) tan jarohati olib, reanimatsiyaga yotqizilgan;
  • Toshkentdagi Bunyodkor shoh ko‘chasining Chilonzor tumanidan o‘tgan qismida soat taxminan 4:45 da Spark haydab ketayotgan 36 yoshli F.Yu. boshqaruvni yo‘qotib, qarama-qarshi yo‘nalishni ajratib turuvchi to‘siqqa borib urilgan va shifokorlarning urinishlariga qaramay, kasalxonada vafot etgan;
  • Toshkent viloyatining Angren shahrida soat taxminan 9:00 da dastlab Nexia-3 avtomobili yo‘lni ajratib turuvchi beton to‘siqqa urilgan, shundan so‘ng shu yo‘nalishda orqadan harakatlanib kelayotgan mashinalar sekinlashgan vaqtda me’yoridan ko‘p yuk ortilgan MAN yuk mashinasi tormozi ishlamay qolib, uchta Lacetti, Nexia-2 va Cobalt bilan to‘qnashgan (Lacetti’lardan biri yonib ketgan), hodisa oqibatida yetti kishi halok bo‘lgan, 14 kishi tan jarohati olib, kasalxonaga yotqizilgan;
  • Xorazmning Yangiariq tumanida soat taxminan 17:30 da 39 yoshli haydovchi qoidaga xilof ravishda o‘ng tomondan quvib o‘tishga urinish vaqtida yo‘l chetidagi olti nafar 11-sinf bitiruvchilarini urib yuborib, ariqqa ag‘darilgan. Hodisa oqibatida uch nafar o‘quvchi hodisa joyida, bir nafari kasalxonada vafot etgan, yana ikki o‘quvchi og‘ir ahvolda shifoxonada yotibdi;
  • Namanganning Pop tumanida soat taxminan 18:00 da haydovchi J.J. Nexia avtomobilida harakatlanayotib, boshqaruvni yo‘qotgan va beton to‘siqqa urilib, pastlikka tushib ketgan. Oqibatda haydovchi hamda ikki yo‘lovchi — 20 yoshli A.R. va 35 yoshli A.Q.lar tan jarohatlari olib, tuman shifoxonasiga murojaat qilgan, yana bir yo‘lovchi Ya.B. esa jarohatlari sababli vafot etgan.

Shunday qilib, bir kunda yuz bergan ushbu 5 ta YTH oqibatida jami 15 kishi halok bo‘lgan, 21 kishi tan jarohati olib, kasalxonaga yotqizilgan. Ma’lumot uchun, O‘zbekistonda 2021-yilning dastlabki to‘rt oyida davomida yuz bergan jami 2242 ta YTH oqibatida 557 kishi halok bo‘lgan (kuniga o‘rtacha 4,7 qurbon), 1684 kishi tan jarohati olgan.

Rossiyadagi yo‘l-transport hodisalari muammosiga bag‘ishlangan “Karta DTP” notijoriy loyihasi ma’lumotlariga ko‘ra, 2021-yilning 24-may kuni Rossiya yo‘llarida yuz bergan YTHlar oqibatida 20 kishi halok bo‘lgan

Avvalroq Farg‘ona viloyatida may oyining bir haftasi davomida yuz bergan YTHlar oqibatida jami 20 kishi halok bo‘lgani haqida xabar berilgan edi. Taqqoslash uchun, viloyatda 2021-yilning dastlabki to‘rt oyi (ilk 17 haftasi) davomida yuz bergan YTHlar oqibatida jami 64 YTH yuz bergan edi.