Lexus kompaniyasi yangi LC kabrioleti sovuq havo sharoitida noodatiy sinovdan o‘tkazilgani tasvirlangan videorolik bilan bo‘lishdi. Avtomobilni yig‘ish sifatini tekshirish vaqtida u sanoat muzlatkichiga Selsiy bo‘yicha -18 daraja sovuqqa 12 soatga joylashtirilgan, deb xabar beradi Motor.
Lexus LC’ning o‘ziga xos sinovi Milbruk shahridagi ixtisoslashgan poligondagi iqlim kamerasida amalga oshirilgan. Bu yerda himoya qurilmalarining mustahkamligi tekshiriladi, shuningdek, Selsiy bo‘yicha +85 darajadan -60 darajagacha bo‘lgan yo‘l-transport vositalari sinovdan o‘tkaziladi. Test uchun muhandislar kameraga -18 darajani o‘rnatgan, kabriolet kuzovi ustidan suv quygan, shuningdek, avtomobil interyeri ko‘rinib turishi uchun uning tom qismi yig‘ib qo‘yilgan. Bu kabi sharoitda Lexus LC 12 soat davomida turgan.
Ekstremal darajadagi sovuqdan so‘ng mutaxassislar mashinani poyga yo‘li bo‘ylab harakatlantirgan. Haydovchi sifatida muhandislar Pol Svift ismli professional kaskadyorni chaqirgan va u hech qanday qiyinchiliksiz 457 ot kuchiga ega Lexus LC’ni o‘t oldirgan. Bundan tashqari, sinovchining ta’kidlashicha, kabrioletning barcha displey va datchiklari bir zumda ishga tushgan.
Trassaga chiqishi bilan haydovchi rul va o‘rindiqlarni isitish tizimini yoqqan. Sinov murakkab burilish va o‘nqir-cho‘nqirliklarga ega yo‘nalishda amalga oshirilgan. Harakat vaqtida kabrioletdan muz bo‘laklari ajralib tushgan, biroq bu kaskadyorga Lexus LC’ning imkoniyatlaridan to‘liq foydalanishga to‘sqinlik qilmagan.
Avvalroq Mercedes-Benz kompaniyasi EQC 4x4² elektroyo‘ltanlamasi prototipi nimalarga qodir ekanligi tasvirlangan navbatdagi rolik bilan bo‘lishgandi.
Izoh (0)