Yevropaning top-ligalari qatorida Ispaniya chempionatida ham 2020/21-yilgi mavsum yakunlandi. “Daryo” La Liganing ortda qolgan mavsumi qisqacha tahlilini taqdim etadi.
So‘nggi soniyalargacha cho‘zilgan intriga
So‘nggi yillarda “Real” va “Barselona”ning gegemoniyasiga o‘rganib qolgan ishqibozlar uchun bu mavsum o‘zgacha o‘tdi. Chempion nomi so‘nggi turgacha ham aniq bo‘lmadi. Bundan tashqari 37-turgacha ligani tark etadigan birorta jamoa nomi ma’lum emasdi.
Diyego Simeone jamoasi uzoq vaqt Primera peshqadamligini o‘zida saqlab turdi. Yanvar oyida “matraschilar” eng yaqin ta’qibchidan 11 ochko oldinda edi. Jamoa birinchi davrani shunchaki fantastik o‘tkazdi: 19 o‘yinda 16 g‘alaba, 2 durang va 1 mag‘lubiyat. Biroq ikkinchi davrada jamoa ketma-ket ochko yo‘qotishni boshladi. Mavsumning ikkinchi qismida Madrid jamoasi 3 ta mag‘lubiyat va oltita durang qayd etdi.
Biroq ularning baxtiga “Real” va “Barselona” ham sinxron ravishda ochko yo‘qotishda davom etdi. Katta o‘yinlarni o‘z foydasiga hal qilishda tengsiz “Real” o‘rtamiyona darajadagi uchrashuvlarni ko‘p boy berib qo‘ydi. Shuningdek, jamoaga so‘nggi turlarda barqarorlik yetishmadi.
Ketma-ket ikkita mavsumni yig‘lab tugatgan Luis Suares ertagi
Ta’kidlash joiz, “Atletiko” mavsumni chempionlarga xos iroda bilan o‘tkazdi. Simeone jamoasi 11 ta uchrashuvni bitta to‘p farqi bilan yutishga erishdi. Ko‘plab o‘yinlarda jamoa o‘z darvozasidan to‘p olib chiqqach, natijani o‘zi tomonga burishga muvaffaq bo‘ldi. Va, albatta, bu borada Suaresdek “yirtqich”ning o‘rni beqiyos bo‘ldi.
La Liganing 2020/21-yilgi mavsumdagi qahramoni, shubhasiz, Luis Suares bo‘ldi. “Barselona” ustozi Ronald Kumanga xush kelmagan hujumchi 2019/20-yilgi mavsum yakunida katalonlar safini ko‘z yoshi bilan tark etdi. Bu alamzadalik mavsum davomida Suares va “Atletiko”ga ko‘pincha foyda keltirdi. Urugvaylik tajribali futbolchi musobaqaning 11 ta o‘yinida “Atletiko”ga g‘alaba keltirgan gol muallifiga aylandi.
Suares “Atletiko”ga o‘tish asnosida o‘z joyini topdi. Kutilganidek forvard o‘z mentalitetiga mos jamoa va murabbiy bilan ikkinchi yoshligini boshdan kechirmoqda.
Luis “Valyadolid”ga qarshi kechgan so‘nggi tur o‘yinida ham jamoasini uch ochko keltirgan golni urdi. Bu gol “Atletiko”ga nafaqat g‘alaba, balki chempionlikni ham olib keldi. O‘yindan keyin Suares yig‘ladi va o‘tgan mavsum uni yerga urishganini ham bir eslab o‘tdi...
“Real Madrid” va 60 jarohat
Zinedin Zidan jamoasi bu mavsum Primerada raqiblari qatorida jarohatlar bilan ham kurashishiga to‘g‘ri keldi. Mavsum davomida jamoada 62 ta jarohat kuzatildi (ularning 13 tasi koronavirusga chalinish holati) — bu liga tarixidagi rekord natija hisoblanadi. E’tiborlisi, jarohatlarining deyarli yarmi mushaklar bilan bog‘liq bo‘ldi — bu klub uchun o‘tgan mavsumdagidan uch barobar, undan avvalgi uch mavsumdan ikki barobar ko‘p degandi. Buning ortidan jamoada ichki surishtiruv ishlari o‘tkazilgani haqida xabarlar yangradi.
Eden Azar, Serxio Ramos, Dani Karvaxal va Federiko Valverde mavsumning katta qismini lazaretda o‘tkazdi. Mavsumning ikkinchi yarmida Zidan himoya chizig‘ida kadrlar bilan bog‘liq jiddiy muammoga duch keldi. Markaziy himoyada muntazam rotatsiya qilishga to‘g‘ri keldi.
Xullas, fransiyalik mutaxassisning shtabi uchun bu juda og‘ir mavsum bo‘ldi. Madridliklar “Barselona”ga qarshi ikkinchi davradagi klasiko Nacho—Militao — markaziy himoya juftligi bilan o‘tkazishga majbur bo‘ldi. Aprel boshidagi bu o‘yinda mavsum davomida Karvaxalning o‘rnini bilintirmay kelayotgan Lukas Vaskes ham jiddiy jarohat olib, mavsum oxirigacha safdan chiqdi.
Zidanning baxtiga markazning tajribali futbolchilari — Kroos, Modrich va Kazemiro barqaror o‘yin namoyish qildi. Hujum chizig‘ida Karim Benzema katta ko‘lamli ish bajardi. Individual jihatdan olib qaraganda Benzema mavsumda eng yaxshilardan biri bo‘ldi.
Yuqoridagilarni hisobga olganda mavsum “Real” uchun yomon bo‘lmagandek. Biroq jamoa 11 yil deganda ilk bor mavsumni sovrinsiz yakunladi. Bu esa “Qirollik klubi”da ko‘pincha kechirilmaydigan holat. Ayni vaqtda “Real”dagi asosiy intriga Zinedinning kelajagi bo‘lib turibdi. So‘nggi xabarlarga ko‘ra, mutaxassis o‘ylab olish uchun bir hafta muddat so‘ragan.
Bartomeu davri asoratlari bilan kurashayotgan “Barselona”
“Barselona” bu mavsumda beqaror natijalari bilan yodda qoldi. Ba’zi o‘yinlarda 5-6 talab gol urgan katalonlar keyingi turda ochko yo‘qotishi odatiy holga aylandi. Shuningdek, jamoa Messisiz deyarli hech nima qila olmasligi yana ko‘rinib qoldi. Argentinalik futbolchi mavsum davomida jamoa gollarining 1/3 qismiga muallif bo‘ldi.
La Liga 2020/21-yilgi mavsumi yakunlari
“Atletiko”, “Real”, “Barselona” va “Sevilya” Chempionlar Ligasiga yo‘llanma oldi. “Real Sosyedad” va “Betis” Yevropa Ligasida o‘ynaydi. “Vilyarreal” esa yangi tashkil etilgan Konferensiyalar Ligasida ishtirok etadi.
Chempionatni “Ueska”, “Valyadolid” va “Eybar” tark etdi.
Mavsumning eng yaxshi darvozaboni uchun topshiriladigan Samora sovrini Yan Oblakka nasib etdi. “Atletiko” posboni mavsumning 18 ta o‘yinida o‘z darvozasi daxlsizligini saqlab qoldi.
Faktlar, statistika va raqamlar
- Messi ketma-ket beshinchi marta La Liganing eng yaxshi to‘purari bo‘ldi;
- Luis Suares “Barselona” va “Atletiko” safida Primerada g‘olib chiqqan uchinchi futbolchi bo‘ldi. Unga qadar David Vilya va Arda Turon bu natijaga erishgandi;
- “Real” 11 yil deganda (2009/10-yilgi mavsum) ilk bor mavsumni sovrinsiz yakunladi. Shuningdek, jamoa birinchi marta Zinedin Zidan bilan mavsum davomida birorta sovrin qo‘lga kirita olmadi;
- “Atletiko” 86 ochko to‘plagan holda chempionlikka erishdi. Bu 2008-yildan (“Real”, 85) beri kuzatilgan eng past ko‘rsatkich;
- Yan Oblak (“Atletiko”) beshinchi marta La Ligada mavsumning eng yaxshi darvozaboni bo‘ldi;
- “Barselona” 2007/08-yilgi mavsumdan beri ilk bor La Ligada kuchli ikkilikka kira olmadi;
- “Atletiko” La Ligada “Real” va “Barselona”ning 6 yillik gegemoniyasiga chek qo‘ydi.
Mavsum qahramonlari
- Eng yaxshi o‘yinchi: Luis Suares (“Atletiko”);
- Eng yaxshi murabbiy: Zinedin Zidan (“Real”);
- Eng yaxshi yosh o‘yinchi: Pedri (“Barselona”);
- Eng yaxshi transfer: Luis Suares (“Atletiko”).
Mavsum ramziy terma jamoasi:
Darvozabon: Yan Oblak (“Atletiko”);
Himoyachilar: Kiran Trippyer, Mario Ermoso (ikkisi “Atletiko”), Jyul Kunde (“Sevilya”), Ferlan Mendi (“Real”);
Yarimhimoyachilar: Kazemiro, Luka Modrich (ikkisi “Real”), Markos Lyorente (“Atletiko”);
Hujumchilar: Lionel Messi (“Barselona”), Luis Suares (“Atletiko”), Karim Benzema (“Real”).
Muallif: Nodirxon Hamidxonov
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)