Европанинг топ-лигалари қаторида Испания чемпионатида ҳам 2020/21 йилги мавсум якунланди. «Дарё» Ла Лиганинг ортда қолган мавсуми қисқача таҳлилини тақдим этади.
Сўнгги сонияларгача чўзилган интрига
Сўнгги йилларда «Реал» ва «Барселона»нинг гегемониясига ўрганиб қолган ишқибозлар учун бу мавсум ўзгача ўтди. Чемпион номи сўнгги тургача ҳам аниқ бўлмади. Бундан ташқари 37-тургача лигани тарк этадиган бирорта жамоа номи маълум эмасди.
Диего Симеоне жамоаси узоқ вақт Примера пешқадамлигини ўзида сақлаб турди. Январь ойида «матрасчилар» энг яқин таъқибчидан 11 очко олдинда эди. Жамоа биринчи даврани шунчаки фантастик ўтказди: 19 ўйинда 16 ғалаба, 2 дуранг ва 1 мағлубият. Бироқ иккинчи даврада жамоа кетма-кет очко йўқотишни бошлади. Мавсумнинг иккинчи қисмида Мадрид жамоаси 3 та мағлубият ва олтита дуранг қайд этди.
Бироқ уларнинг бахтига «Реал» ва «Барселона» ҳам синхрон равишда очко йўқотишда давом этди. Катта ўйинларни ўз фойдасига ҳал қилишда тенгсиз «Реал» ўртамиёна даражадаги учрашувларни кўп бой бериб қўйди. Шунингдек, жамоага сўнгги турларда барқарорлик етишмади.
Кетма-кет иккита мавсумни йиғлаб тугатган Луис Суарес эртаги
Таъкидлаш жоиз, «Атлетико» мавсумни чемпионларга хос ирода билан ўтказди. Симеоне жамоаси 11 та учрашувни битта тўп фарқи билан ютишга эришди. Кўплаб ўйинларда жамоа ўз дарвозасидан тўп олиб чиққач, натижани ўзи томонга буришга муваффақ бўлди. Ва, албатта, бу борада Суаресдек «йиртқич»нинг ўрни беқиёс бўлди.
Ла Лиганинг 2020/21 йилги мавсумдаги қаҳрамони, шубҳасиз, Луис Суарес бўлди. «Барселона» устози Рональд Куманга хуш келмаган ҳужумчи 2019/20 йилги мавсум якунида каталонлар сафини кўз ёши билан тарк этди. Бу аламзадалик мавсум давомида Суарес ва «Атлетико»га кўпинча фойда келтирди. Уругвайлик тажрибали футболчи мусобақанинг 11 та ўйинида «Атлетико»га ғалаба келтирган гол муаллифига айланди.
Суарес «Атлетико»га ўтиш асносида ўз жойини топди. Кутилганидек форвард ўз менталитетига мос жамоа ва мураббий билан иккинчи ёшлигини бошдан кечирмоқда.
Луис «Вальядолид»га қарши кечган сўнгги тур ўйинида ҳам жамоасини уч очко келтирган голни урди. Бу гол «Атлетико»га нафақат ғалаба, балки чемпионликни ҳам олиб келди. Ўйиндан кейин Суарес йиғлади ва ўтган мавсум уни ерга уришганини ҳам бир эслаб ўтди...
«Реал Мадрид» ва 60 жароҳат
Зинедин Зидан жамоаси бу мавсум Примерада рақиблари қаторида жароҳатлар билан ҳам курашишига тўғри келди. Мавсум давомида жамоада 62 та жароҳат кузатилди (уларнинг 13 таси коронавирусга чалиниш ҳолати) — бу лига тарихидаги рекорд натижа ҳисобланади. Эътиборлиси, жароҳатларининг деярли ярми мушаклар билан боғлиқ бўлди — бу клуб учун ўтган мавсумдагидан уч баробар, ундан аввалги уч мавсумдан икки баробар кўп деганди. Бунинг ортидан жамоада ички суриштирув ишлари ўтказилгани ҳақида хабарлар янгради.
Эден Азар, Серхио Рамос, Дани Карвахаль ва Федерико Вальверде мавсумнинг катта қисмини лазаретда ўтказди. Мавсумнинг иккинчи ярмида Зидан ҳимоя чизиғида кадрлар билан боғлиқ жиддий муаммога дуч келди. Марказий ҳимояда мунтазам ротация қилишга тўғри келди.
Хуллас, франциялик мутахассиснинг штаби учун бу жуда оғир мавсум бўлди. Мадридликлар «Барселона»га қарши иккинчи даврадаги класико Начо—Милитао — марказий ҳимоя жуфтлиги билан ўтказишга мажбур бўлди. Апрель бошидаги бу ўйинда мавсум давомида Карвахалнинг ўрнини билинтирмай келаётган Лукас Васкес ҳам жиддий жароҳат олиб, мавсум охиригача сафдан чиқди.
Зиданнинг бахтига марказнинг тажрибали футболчилари — Кроос, Модрич ва Каземиро барқарор ўйин намойиш қилди. Ҳужум чизиғида Карим Бензема катта кўламли иш бажарди. Индивидуал жиҳатдан олиб қараганда Бензема мавсумда энг яхшилардан бири бўлди.
Юқоридагиларни ҳисобга олганда мавсум «Реал» учун ёмон бўлмагандек. Бироқ жамоа 11 йил деганда илк бор мавсумни совринсиз якунлади. Бу эса «Қироллик клуби»да кўпинча кечирилмайдиган ҳолат. Айни вақтда «Реал»даги асосий интрига Зинединнинг келажаги бўлиб турибди. Сўнгги хабарларга кўра, мутахассис ўйлаб олиш учун бир ҳафта муддат сўраган.
Бартомеу даври асоратлари билан курашаётган «Барселона»
«Барселона» бу мавсумда беқарор натижалари билан ёдда қолди. Баъзи ўйинларда 5-6 талаб гол урган каталонлар кейинги турда очко йўқотиши одатий ҳолга айланди. Шунингдек, жамоа Мессисиз деярли ҳеч нима қила олмаслиги яна кўриниб қолди. Аргентиналик футболчи мавсум давомида жамоа голларининг 1/3 қисмига муаллиф бўлди.
Ла Лига 2020/21 йилги мавсуми якунлари
«Атлетико», «Реал», «Барселона» ва «Севилья» Чемпионлар Лигасига йўлланма олди. «Реал Сосьедад» ва «Бетис» Европа Лигасида ўйнайди. «Вильярреал» эса янги ташкил этилган Конференциялар Лигасида иштирок этади.
Чемпионатни «Уэска», «Вальядолид» ва «Эйбар» тарк этди.
Мавсумнинг энг яхши дарвозабони учун топшириладиган Самора соврини Ян Облакка насиб этди. «Атлетико» посбони мавсумнинг 18 та ўйинида ўз дарвозаси дахлсизлигини сақлаб қолди.
Фактлар, статистика ва рақамлар
- Месси кетма-кет бешинчи марта Ла Лиганинг энг яхши тўпурари бўлди;
- Луис Суарес «Барселона» ва «Атлетико» сафида Примерада ғолиб чиққан учинчи футболчи бўлди. Унга қадар Давид Вилья ва Арда Турон бу натижага эришганди;
- «Реал» 11 йил деганда (2009/10 йилги мавсум) илк бор мавсумни совринсиз якунлади. Шунингдек, жамоа биринчи марта Зинедин Зидан билан мавсум давомида бирорта соврин қўлга кирита олмади;
- «Атлетико» 86 очко тўплаган ҳолда чемпионликка эришди. Бу 2008 йилдан («Реал», 85) бери кузатилган энг паст кўрсаткич;
- Ян Облак («Атлетико») бешинчи марта Ла Лигада мавсумнинг энг яхши дарвозабони бўлди;
- «Барселона» 2007/08 йилги мавсумдан бери илк бор Ла Лигада кучли иккиликка кира олмади;
- «Атлетико» Ла Лигада «Реал» ва «Барселона»нинг 6 йиллик гегемониясига чек қўйди.
Мавсум қаҳрамонлари
- Энг яхши ўйинчи: Луис Суарес («Атлетико»);
- Энг яхши мураббий: Зинедин Зидан («Реал»);
- Энг яхши ёш ўйинчи: Педри («Барселона»);
- Энг яхши трансфер: Луис Суарес («Атлетико»).
Мавсум рамзий терма жамоаси:
Дарвозабон: Ян Облак («Атлетико»);
Ҳимоячилар: Киран Триппьер, Марио Эрмосо (иккиси «Атлетико»), Жюл Кунде («Севилья»), Ферлан Менди («Реал»);
Яримҳимоячилар: Каземиро, Лука Модрич (иккиси «Реал»), Маркос Льоренте («Атлетико»);
Ҳужумчилар: Лионель Месси («Барселона»), Луис Суарес («Атлетико»), Карим Бензема («Реал»).
Муаллиф: Нодирхон Ҳамидхонов
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)