АҚШ элчиси Дэниел Розенблюм «Xabar.uz» нашрига берган интервьюсида 2021 йилнинг октябрь ойида Ўзбекистонда бўлиб ўтадиган президентлик сайловлари масаласига ҳам тўхталиб ўтди.
«Сайловлар эркин, адолатли ва рақобатдош бўлиши чиндан демократик жамият белгиларидан саналади. Демократия ҳамиша ривожланиб турадиган жараён, эволюция ва сайловлар унинг муҳим бир қисмидир. У орқали халқлар ўз раҳбарларини сайлайди.
Сайловлар адолатли ташкил этилиши, унда рақобатлашмоқчи бўлганларга имкон ва барча шароитлар бўлиши жуда муҳим. Агар кимдир сиёсий партия тузмоқчи бўлса, унинг йўлига қўйиладиган тўсиқлар бўлмаслиги керак.
Шуни биламанки, келаётган сайловларда Ўзбекистонда халқаро ҳамжамият ҳам иштирок этади. АҚШ ЕХҲТ мониторинг ишида қатнашади ва сайловларни яқиндан кузатиб боради. Биз Марказий сайлов комиссиясига сайловларни ўтказишда техник кўмак бериш ниятидамиз ва жараённи яқиндан кузатиб борамиз. Демократия бир эволюция демакдир ва у тўғри йўналишга эга бўлмоғи муҳимдир. Биз буни Ўзбекистондан кутиб қоламиз», — дейди АҚШ элчиси.
Эслатиб ўтамиз, Президент Шавкат Мирзиёев 29 декабрь куни Олий Мажлисга йўллаган Мурожаатномасида 2021 йилда ўтказиладиган «давлат ва халқ ҳаётидаги муҳим сиёсий ҳодиса» — президентлик сайловлари масаласига тўхталиб ўтганди. Ўшанда Шавкат Мирзиёев Марказий сайлов комиссияси «бўлажак сайловларнинг миллий қонунчилик ва умумеътироф этилган халқаро демократик тамойиллар асосида юксак савияда ташкил этилишига алоҳида эътибор қаратиши» лозимлигини таъкидлаганди.
Изоҳ (0)