AQShning NASA milliy kosmik agentligi Long March 5b raketasi qoldiqlarining Hind okeaniga tushishi sababli Xitoyni kosmik chiqindilarni tashlashning me’yoriy talablariga javob bermayotganlikda aybladi, deb yozmoqda “Korrespondent.net”.
“Davlatlar kosmik obyektlarning qaytib kelganidan keyin insonlar va Yer uchun xavfni minimallashtirishi hamda bunday operatsiyalarnining shaffofligini maksimallashtirishi lozim. Xitoy kosmik chiqindilarni tashlash uchun o‘rnatilgan me’yoriy talablarga javob bermayapti. Xitoy va boshqa barcha kosmik davlatlar, shuningdek, tijorat tashkilotlari kosmik faoliyatning xavfsizligi, barqarorligi va uzoq muddatli faoliyatini ta’minlab, kosmosda mas’uliyatli va shaffof harakat qilishi juda muhimdir”, — deyiladi NASA rahbari Bill Nelsonning bayonotida.
Ma’lumot uchun, aprel oyida Xitoyning bo‘lg‘usi kosmik stansiyasining asosiy modulini Yerga yaqin orbitaga olib chiqqan “Katta marsh-5” (Long March 5b, “Chanjchen-5”) eltuvchi raketasi pog‘onasining bo‘laklari Hind okeaniga qulab tushdi.
“Tyanxe” bazaviy moduli (“Osmon garmoniyasi”) raketasi Xaynan provinsiyasidagi Venchan kosmodromidan 29-aprel kuni mahalliy vaqt bilan soat 11:23 da (Toshkent vaqti bilan soat 08:23 da) uchirilgan edi.
G‘arb kosmik agentliklari raketaning qariyb 18 tonnalik ikkinchi pog‘onasi orbitadan nazoratsiz tarzda tushayotgani va bo‘laklar aholi yashaydigan hududlarga tushishi mumkinligi haqida xulosaga keldi. “Shunisi aniqki, Xitoy bo‘laklarning qulashi bilan bog‘liq mas’uliyat standartlariga rioya qilmaydi”, — degan edi NASA vakili. Xitoy, o‘z navbatida, vaziyat shtat doirasida ekanini ta’kidladi.
Izoh (0)