O‘zbekiston aholisi 2021-yilning yanvar–aprel oylarida naqd pul yechib olish va xorijiy valyuta sotib olishni oshirdi. Bu haqda Markaziy bank naqd pul muomalasi bo‘yicha qisqacha sharhida ma’lum qildi.

Qayd etilishicha, 2021-yil yanvar–aprel oylarida banklar orqali naqd pul aylanmasi hajmi 149,3 trillion so‘mni tashkil etgan. Bu 2020-yilning mos davriga nisbatan 41,6 foizga ko‘p. Jumladan, banklar kassalariga naqd pul tushumlari 75,4 trillion so‘mni, chiqim qilingan naqd pullar esa 73,9 trillion so‘mni tashkil etgan.

Yanvar–aprel oylarida bank kassalaridan, shu jumladan, bankomatlardan berilgan naqd pullar 2020-yil yanvar–aprel oylariga nisbatan 38,5 foizga oshdi. Bunday holat bank kartalaridan naqd pul yechish hajmining 10,9 trillion so‘mga (1,7 barobar) hamda naqd chet el valyutasini sotib olish uchun yo‘naltiriladigan naqd pullar hajmi 6,5 trillion so‘mga (1,5 barobar) o‘sishi hisobiga yuzaga keldi.

2021-yil yanvar–aprel oylarida bank kartalariga 78,4 trillion so‘mlik mablag‘lar kelib tushgan bo‘lsa, ushbu davrda bank kartalaridagi 25,9 trillion so‘mlik (33,1 foiz) mablag‘lar aholi tomonidan naqdlashtirib olingan.

Eslatib o‘tamiz, 2020-yilda O‘zbekistondagi banklar orqali naqd pul aylanmasi hajmi 60,1 trillion so‘mni tashkil etib, bu ko‘rsatkich 2019-yilga nisbatan 25,4 foizga oshgan edi. Jismoniy shaxslar tomonidan valyuta ayirboshlash shoxobchalari orqali 2020-yilda sotilgan chet el valyutasi miqdori 4,6 milliard dollarni tashkil etgan. Bu 2019-yildagi ko‘rsatkichga (3,8 milliard) qaraganda 21 foizga ko‘p.