Namangan viloyatida mast fuqaro o‘zidan 14 yosh katta tanishini urib, o‘ldirib qo‘ydi, deya xabar bermoqda Tergov departamenti.
Qayd etilishicha, 2021-yilning 6-may kuni soat 22:00 larda Pop tumani Hazratibob shoh ko‘chasi hududida 38 yoshli D.U. 52 yoshli G.T. bilan mast holatda o‘zaro janjallashib qolishlari oqibatida uning yuz qismiga bir marotaba mushti bilan urganida G.T. bo‘y baravar yiqilishi natijasida hodisa joyida vafot etgan.
Mazkur holat yuzasidan Pop tumani IIB huzuridagi Tergov bo‘linmasi tomonidan D.U.ga nisbatan Jinoyat kodeksining 104-moddasi 3-qismi “d” bandi (qasddan badanga og‘ir shikast yetkazish) bilan jinoyat ishi qo‘zg‘atilib, qamoqqa olish tarzidagi ehtiyot chorasi qo‘llanilgan.
Tergov harakatlari davomida marhum G.T. D.U.ni yoshligida sodir qilgan o‘g‘riligini eslatib, mazax qilib, uning yuz qismiga bir shapaloq urgani natijasida ushbu jinoyat kelib chiqqani aniqlangan.
Hozirda tergov davom etmoqda.
Bundan avval Andijonda xonadonida ijarada yashayotgan ayolning 3 yoshli farzandi ustiga qaynoq suv quyib, bolaning o‘limiga sababchi bo‘lgan erkak 8 yilga qamalgani, Toshkentda “havo sharlari” sotuvchilari o‘rtasida kelib chiqqan janjal oqibatida bir kishi pichoqlangani hamda Surxondaryoda to‘satdan vafot etgani aytilgan shaxs, kaltaklab o‘ldirilgani aniqlangani haqida xabar berilgandi.
