So‘nggi vaqtlarda ijtimoiy tarmoqlarda Rossiyaning “Sputnik V” vaksinasi O‘zbekistonga amaldorlar uchun olib kelingan, degan xabarlar paydo bo‘ldi. Bunga ushbu vaksina bilan emlanish uchun tibbiyot bo‘limlariga murojaat qilgan aksariyat  fuqarolarga rad javobi berilayotgani sabab bo‘lgan. SSV huzuridagi Sanitariya-epidemiologik osoyishtalik va jamoat salomatligi xizmati rahbari o‘rinbosari Botir Qurbonov bunga munosabat bildirdi.

Foto: Sog‘liqni saqlash vazirligi

“Toshkent shahrida mavjud emlash markazlariga yoki emlash punktlariga murojaat qilayotgan ayrim shaxslar yoshi 65 yoshdan kam bo‘lganligi uchun emlanmayotganligi to‘g‘risidagi e’tirozlar bor. Bir necha marotaba bizni o‘zimizga ham murojaat qilishgan: ‘men ‘Sputnik V’ vaksinasi bilan emlanmoqchiman, emlash markaziga yoki emlash punktiga borsam meni qaytarishdi’ deyishadi. Birinchi navbatda yoshi nechadaligini so‘raymiz. Yoshi 60 da, 50 da, 40 da. Keyingi bosqichlarda esa emlash kontingenti yoki jamoasi o‘zgaradi. Lekin, hozirgi kunda 65 yoshdan kattalarni ixtiyoriy ravishda, bevosita 3 ta vaksinadan birini tanlagan holda emlanishi ko‘rsatilgan”, — degan SEX rahbari o‘rinbosari 6-may kuni COVID-19 qarshi emlash yo‘nalishida qilinayotgan ishlar tahliliga bag‘ishlangan matbuot anjumanida.

Botir Qurbonovning qo‘shimcha qilishicha, bugungi kunda qadar Toshkentda 23 ming kishi “Sputnik V” bilan emlandi. Bugun va ertadan boshlab respublikaning barcha hududlariga ushbu vaksinaning yuborilishi ko‘zda tutilgan.

Eslatib o‘tamiz, 1-may kuni Oliy Majlis Qonunchilik palatasi spikeri o‘rinbosari Odiljon Tojiyev (1984-yilda tug‘ilgan) o‘zining Telegram kanalida “Sputnik V” bilan emlanganini ma’lum qilgandi.

6-may kuni u koronavirusga qarshi “Sputnik V” vaksinasini sog‘lig‘i bilan bog‘liq zaruratga ko‘ra olganini bildirdi.

Ma’lumot uchun, O‘zbekistonda koronavirusga qarshi birinchi navbatda emlanadigan fuqarolar qatoriga surunkali kasalliklari bor aholi ham kiritilgan.

O‘zbekistonga “Sputnik V” vaksinasining birinchi partiyasi 23-aprelga o‘tar kechasi yetkazib berilgan edi (aynan qancha miqdorda vaksina olib kelingani ma’lum qilinmagan). O‘zbekistonga aholini emlash uchun olib kelinadigan “Sputnik V”ning yarmini tadbirkor Alisher Usmonov moliyalashtirgan. 31-mart kuni  ushbu vaksinadan jami 1 million doza sotib olinishi ko‘zda tutilgani ma’lum qilingandi.