Buxoroda 2022-yildan boshlab har ikki yilda tilla kashtachilik va zargarlik buyumlari festivali bo‘lib o‘tadi

Buxoroda 2022-yildan boshlab har ikki yilda tilla kashtachilik va zargarlik buyumlari xalqaro festivali o‘tkaziladi. Bu haqda Shavkat Mirziyoyevning 29-apreldagi farmonida ta’kidlangan, deb yozadi Norma.

Festival doirasida ko‘rik tanlov, taqdimot, ko‘rgazmalar, teatrlashtirilgan konsert va ko‘ngilochar dasturlar, madaniy-ma’rifiy hamda targ‘ibot-tushuntirish tadbirlari tashkil etiladi. Festival 2022-yil 21—25-may kunlari bo‘lib o‘tishi kutilmoqda.

Festival bilan birga Toshkentda har yili uskunalar, texnologiyalar hamda zargarlik sanoati mahsulotlarining xalqaro ko‘rgazmasi va savdosi bo‘lib o‘tadi. O‘zbek zargarlik buyumlari yarmarkasi xorijiy mamlakatlarning zargarlik sanoati vakillari, xorijiy investorlar, ekspertlar va mutaxassislar ishtirokida bo‘lib o‘tadi.

Festivalning maqsadi iste’dodli hunarmandlarni aniqlash, tilla kashtachilik va zargarlik buyumlarini rivojlantirishni jadallashtirish, sayyohlarni jalb qilish, turli tomoshalar, xususan, folklor festivallari, folklor ansambllari, dorbozlar, askiyachi va qiziqchilar chiqishi, hunarmandlar darslari va boshqalarni tashkil etish.

Bundan avval O‘zbekistonda zargarlarga qimmatbaho metallarni to‘g‘ridan to‘g‘ri sotib olish huquqi berilishi haqida xabar qilingandi.