O‘zbekiston Prezidenti Shavkat Mirziyoyev 30-aprel kuni mamlakatda bo‘lib turgan YXHT Demokratik institutlar va inson huquqlari bo‘yicha byurosi direktori Matteo Mekachchi boshchiligidagi delegatsiyani qabul qildi.
Uchrashuvda O‘zbekiston bilan DIIHB o‘rtasidagi konstruktiv muloqot va samarali sheriklikni rivojlantirishning dolzarb masalalari muhokama qilindi.
Davlat rahbari ikki tomonlama hamkorlik rivojida keyingi yillarda jiddiy oldinga siljishga erishilganini mamnuniyat bilan qayd etdi. Byuroning keng ko‘lamli missiyasi ilk bor mamlakatimizdagi Prezident va parlament saylovlarini kuzatishda ishtirok etdi.
DIIHBning tavsiyalarini implementatsiya qilishda, shu jumladan, O‘zbekiston Saylov kodeksini qabul qilish va takomillashtirish doirasida muvaffaqiyatli hamkorlik olib borilgani ta’kidlandi.
Byuro ekspertlari Inson huquqlari bo‘yicha milliy strategiya hamda vijdon erkinligi va diniy tashkilotlar to‘g‘risidagi qonun loyihasini ishlab chiqishga jalb etilgan edi.
O‘zbekiston DIIHB bilan, eng avvalo, inson huquqlari, so‘z, din va e’tiqod erkinligi, gender tenglik, yoshlarni qo‘llab-quvvatlash, fuqarolik jamiyati institutlarini rivojlantirish, amalga oshirilayotgan demokratik yangilanishlarning huquqiy bazasini ilg‘or xalqaro amaliyot asosida mustahkamlash borasida uzoq muddatli va samarali sheriklikni davom ettirishdan manfaatdor ekani ta’kidlandi.
Bundan tashqari, O‘zbekistonda bo‘lib o‘tadigan muhim tadbirlarga tayyorgarlik ko‘rish bo‘yicha birgalikda ishlash maqsadida may oyida byuroning baholash missiyasi O‘zbekistonga keladi.
YXHT Demokratik institutlar va inson huquqlari bo‘yicha byurosi direktori Matteo Mekachchi samimiy qabul hamda ochiq va mazmunli suhbat uchun davlat rahbariga minnatdorlik bildirdi.
Direktor mamlakatdagi barcha soha va yo‘nalishlarni qamrab olgan keng ko‘lamli islohotlarni qat’iy qo‘llab-quvvatlab, byuro ularni muvaffaqiyatli amalga oshirishga har tomonlama ko‘maklashishga tayyor ekanini bildirdi.
Bundan avval Shavkat Mirziyoyev Sadir Japarov bilan Qirg‘iziston—Tojikiston chegarasidagi vaziyatni tez fursatda hal etishni muhokama qilgani, Shavkat Mirziyoyev va Gurbanguli Berdimuhamedov “Turkmanboshi ruhi” majmuasiga tashrif buyurgani hamda Shavkat Mirziyoyev iqtisodiy zonalarda amalga oshirilayotgan investitsiya loyihalari muhokamasi yuzasidan yig‘ilish o‘tkazgani haqida xabar berilgandi.
Izoh (0)