Vazirlar Mahkamasining qarori bilan 2021-yil uchun davlat maktabgacha ta’lim tashkilotlarida bolalar ta’minoti uchun ota-onalar to‘lovi miqdorlari tasdiqlandi, deb xabar beradi Telegram’dagi “Huquqiy axborot” kanali.
Unga ko‘ra, 1-maydan davlat maktabgacha ta’lim muassasa (MTM)larida bolalar ta’minoti uchun ota-onalar to‘lovining yangi — o‘rtacha 15 foizga oshirilgan miqdorlari joriy etilmoqda.
Tariflar Toshkent shahri, viloyatlar markazlari, viloyat bo‘ysunuvidagi shaharlar va boshqa joydagi MTM uchun tabaqalashtirilgan holda belgilangan. Bolalar bog‘chasi uchun eng yuqori miqdorlar poytaxtda amal qiladi.
Shuningdek, qaror loyihasida ota-onalar tomonidan har oyda bolalar ta’minoti uchun to‘lanadigan haq miqdori o‘rnatilgan tarifning 50 foizi miqdorida belgilanadigan davlat maktabgacha ta’lim muassasalari joylashgan hududlar ham belgilab berilmoqda.
Avvalroq Maktabgacha ta’lim vazirligi “2021-yil uchun davlat maktabgacha ta’lim tashkilotlarida bolalar ta’minoti uchun ota-onalar to‘lovi miqdorlarini tasdiqlash to‘g‘risida”gi Vazirlar Mahkamasi qarori loyihasini muhokamaga qo‘ygan edi.
Izoh (0)