“Toshkent metropoliteni” korxonasi 28-aprel kuni poyezd to‘xtashi sabablarining tekshiruvi natijalarini e’lon qildi.
Ma’lum qilinishicha, Chilonzor yo‘nalishida “Buyuk ipak yo‘li” — “5-bekat” yo‘nalishi bo‘yicha harakatlanayotgan poyezd mashinisti “Milliy bog‘” va “Novza” bekatlari oralig‘ida salbiy vaziyatning oldini olish maqsadida favqulodda to‘xtashni amalga oshirgan.
Uning so‘zlariga ko‘ra, poyezd harakatlanayotgan paytda oldindagi yo‘lda kontakt relslarni quvvatlovchi tokopriyomnikda uchqun chiqayotganini ko‘rib qolgan. Mashinist bu haqda tezkorlik bilan dispetcherga xabar bergan.
Shundan so‘ng yo‘nalishdagi harakat tarkiblari elektr ta’minotdan uzilgan va barcha yo‘lovchilar poyezddan “Novza” bekatigacha evakuatsiya qilingan.
Eslatib o‘tamiz, 28-aprel kuni Toshkent metropolitenining “Novza” bekati yaqinida poyezd vagoni texnik nosozlik oqibatida to‘xtab qoldi. Ijtimoiy tarmoqlarda metro yo‘lovchilari tunnel bo‘ylab piyoda ketayotgani aks etgan video va fotolar tarqaldi. Shundan so‘ng ushbu liniyadagi poyezdlar teskari yo‘nalish bo‘ylab harakatlana boshladi. Poytaxt metropoliteni alohida uchastkalarda bitta yo‘ldan foydalangan holda faoliyatini davom ettirilayotgani ma’lum qilingan.
Izoh (0)