O‘zbekiston ilk bor arxitektura va san’at olamida keng ko‘lamli tadbir — XVII Xalqaro me’morchilik biyennalesida ishtirok etadi. Bu haqda “Daryo”ga O‘zbekiston Madaniyat vazirligi huzuridagi Madaniyat va san’atni rivojlantirish jamg‘armasi matbuot xizmati xabar berdi.

2021-yil 22-maydan 21-noyabrgacha bo‘lib o‘tadigan tadbirda mamlakat “Mahalla: shahar va qishloq hayoti” mavzusidagi milliy pavilyoni bilan ishtirok etadi. O‘zbekiston Markaziy Osiyo mintaqasidan ishtirok etayotgan birinchi davlat bo‘ladi.

Ochilish marosimida O‘zbekiston nomidan bosh vazir o‘rinbosari, O‘zbekiston Milliy pavilyonining tashkiliy qo‘mitasi raisi Aziz Abduhakimov, Madaniyat va san’atni rivojlantirish jamg‘armasi kengashi raisining o‘rinbosari Saida Mirziyoyeva, Madaniyat va san’atni rivojlantirish jamg‘armasining ijrochi direktori va ko‘rgazma loyihasi komissari Gayane Umerova, shuningdek, loyihaviy ishlar ishtirokchilari ishtirok etadi.

Biyennale — har ikki yilda bir marta o‘tkaziladigan ko‘rgazmadir. Ushbu ko‘rgazmada O‘zbekiston ishtirok etishi kutilayotgani haqida 2020-yilning noyabrida ma’lum bo‘lgandi.