“Agrobank” ATB tashabbusi bilan chop etilgan 100 kitob to‘plami taqdimoti kecha 28-aprel kuni, poytaxtdagi Hyatt Regency Tashkent mehmonxonasida bo‘lib o‘tdi. Bo‘lib o‘tgan taqdimotda “Agrobank” ATB mas’ul xodimlari, loyiha mualliflari, olimlar hamda ommaviy axborot vositalari vakillari ishtirok etdi.
Ta’kidlash o‘rinliki, prezidentning Oliy Majlisga yo‘llagan Murojaatnomasida keltirilganidek, kambag‘allikni qisqartirish va aholi daromadlarini ko‘paytirishda eng tez natija beradigan omil bu – qishloq xo‘jaligida hosildorlik va samaradorlikni keskin oshirish.
Darhaqiqat, jahon miqyosda aholining oziq-ovqat xafsizligini ta’minlashda agrar sohaning o‘rni va ahamiyati hamda global bozorlardagi maydonlarda asosiy oziq-ovqat mahsulotlari uchun xomashyo hisoblangan bug‘doy, soya, makkajo‘xori narxi oshib bormoqda.
Dunyo bozorlarida yuzaga kelayotgan bu kabi holatlar mavjud resurs va imkoniyatlardan oqilona foydalanib, hosildorlik va manfaatdorlikni yanada oshirish, sohaga ilm-fan yutuqlari hamda zamonaviy yondashuvlarni joriy etish dolzarblik kasb etmoqda. “Agrobank” ATB respublika qishloq xo‘jaligi sohasining rivojlanishiga hissa qo‘shish uchun nafaqat moliyaviy, balki ijtimoiy loyihalar bilan ham agrar sohaga sarmoya kiritishi e’tiborga molikdir.
Xususan, bank tashabbusi bilan qishloq xo‘jaligida zamonaviy bilimlarni tatbiq etish, sohada fermerlar, tadbirkorlar, dehqon xo‘jaliklari va aholi uchun sodda, tushunarli bo‘lgan metodologik qo‘llanmalarni tayyorlash loyihasi amalga oshirildi. Ushbu loyihani boshlashda Turkiya Respublikasida qishloq xo‘jaligining turli yo‘nalishlari bo‘yicha tayyorlangan o‘quv to‘plamlari o‘rganib chiqildi.
Bu kabi qo‘llanmalar shu kungacha O‘zbekistonda alohida to‘plam shaklida tayyorlanmagan. Mahalliy olimlar tomonidan tayyorlangan kitoblar cheklangan nashrda chop etilgan, keng foydalanuvchilar qo‘liga yetib bormasdan, asosan ilmiy mutaxassislar va talabalar tomonidan o‘rganilgan.
Erkin Qahhorov, “Agrobank” boshqaruvi raisi o‘rinbosari:
“Respublikadagi olimlar va qishloq xo‘jaligi mahsulotlari yetishtiruvchilariga har tomonlama qulay va O‘zbekiston iqlimiga mos 100 kitobdan iborat to‘plam yaratish loyihasi ustida ish olib borildi. Bu loyihani amalga oshirishda “Agrobank” qoshida ilmiy guruh tashkil etildi va 120 nafardan ortiq soha mutaxassislari, olim va o‘qituvchilar jalb etildi.
Dastlabki bosqichda, Toshkent davlat sharqshunoslik instituti bilan hamkorlikda Turkiyadan olib kelingan qo‘llanmalar 20 nafar tarjimonlar ishtirokida o‘zbek tiliga tarjima qilindi. Keyingi bosqichda 7 ta ilmiy muassasalardan 41 nafar ilmiy xodimlar, professor va o‘qituvchilar jalb qilindi hamda mahalliy olimlarning ilmiy salohiyati asosida yurtimiz iqlimi va tabiatiga mos qo‘llanmalar tayyorlandi.
So‘ngra tayyorlangan qo‘llanmalar 52 nafar soha mutaxassislari tomonidan ilmiy hamda 4 nafar muharrirlar guruhi tomonidan taqrizdan o‘tkazilib, dizaynerlar tomonidan yakuniy chop etish holatiga keltirildi. To‘plamda qishloq xo‘jaligi sohasi, jumladan, meva-sabzavot va poliz ekinlari, g‘allachilik, don hamda dukkakli ekinlar, chorvachilik, baliqchilik, asalarichilik kabi tarmoqlarning eng ilg‘or tajribalariga oid, keng qamrovli ilmiy, amaliy ma’lumotlar jamlandi.
Bu to‘plamda mahsulotlarni yetishtirishdan tashqari kasalliklarga qarshi kurashish, mineral va mahalliy o‘g‘itlar turlari, qishloq xo‘jaligi texnikalari to‘g‘risida ham ma’lumotlar berilgan. Ushbu kitoblarni tayyorlash va chop etish bilan bog‘liq bo‘lgan barcha xarajatlar “Agrobank” tomonidan moliyalashtirildi.
Kitoblarni hayotga tatbiq etganimizdan so‘ng shuni bildikki, ya’ni qishloq xo‘jaligiga ilm fan bilan yondashish, ishlab chiqish va integratsiya qilish uchun nafaqat kitob, balki yoshlarimizni o‘qitishni o‘z oldimizga maqsad qilib qo‘ydik. Shu bilan bizning ikkinchi loyihamiz — fermerlar maktabi loyihasiga start berdik. Bugundan boshlab, O‘zbekiston Respublikasining 18 va 35 yosh oralig‘idagi fuqarolariga fermermaktabi.uz saytidagi so‘rovnomada qatnashib, bevosita maktabda o‘qish imkoniyatini yaratib berdik”.
Aynan Turkiya tajribasini o‘rgandik, deb aytdingiz? Turkiya o‘zini qanchalik oqladi va bu bizda qanchalik foydali bo‘ladi?
Turkiya sharoitida bu shunchalik o‘zini oqlaganki, hozir taqdimotda e’tibor bergan bo‘lsangiz, Qishloq xo‘jaligi vaziri o‘rinbosari Alisher To‘rayev bir narsani ta’kidlab o‘tdilar. Ya’ni bu narsaning ustida doimiy izlanishlar to‘xtamasligi kerak. Oziq-ovqat xavfsizligi global masala bo‘lgani uchun doimiy ravishda takomillashib borishi lozim. Shu sababdan, Turkiyada qilingan bu tajriba hozirgacha takomillashtirib borilyapti. Turkiyadagi 100 kitob loyihasi hozirgi kunga kelib agro ensiklopediya darajasiga yetishgan. Bizning ham vazifamiz, maqsadimiz, kelajakda buni agro ensiklopediya darajasiga yetkazish.
Fermerlar maktabi onlayn tarzda bo‘ldimi yoki offlayn?
Fermerlar maktabi — bizning ikkinchi loyihamiz. Sizga bir sirni ochishim mumkin, bu offlayn tarzda o‘qitiladi. O‘zbekiston Respublikasi aholisining yarmi yoshlardan iborat, o‘rtacha yosh 28 yoshni tashkil qiladi. Yoshlarimiz o‘rtasida qishloq xo‘jaligiga bo‘lgan qiziqishni orttirish, qolaversa qishloq xo‘jaligi tadbirkorligiga bo‘lgan qiziqishni uyg‘otish uchun fermerlar maktabini tashkil etdik. Yoshlarimiz ushbu maktabda tahsil olib, birinchi o‘rinda o‘zining qishloq xo‘jaligidagi ilmini rivojlantiradi va bevosita marketing, menejment, bank sohasida, soliq sohasida mahsulotni sota bilishni o‘raganadi. Xullas, bizning maktabimizdan tayyor tadbirkor, mutaxassis bo‘lib chiqadi.
Mazkur to‘plamlar bosqichma-bosqich chop etilib, respublikamizning barcha hududlaridagi fermerlar, tadbirkorlar va dehqon xo‘jaliklariga yetkaziladi. Shuningdek, keng foydalanuvchilar ommasini qamrab olish maqsadida, kitoblarning elektron nusxasidan bankning agrobank.uz internet sayti, maxsus Telegram-boti orqali foydalanish imkoniyati yaratiladi.
Mazkur fermerlar maktabiga har yili 1000 nafar fermer va dehqon xo‘jaliklari rahbarlari, tomorqa yer egalari hamda tadbirkorlar jalb qilinib, agrar o‘quv yurtlari o‘qituvchilari, soha mutaxassislari hamda tadbirkorlar tomonidan o‘qitilib, o‘qitish bilan bog‘liq bo‘lgan barcha xarajatlar “Agrobank” tomonidan amalga oshiriladi.
“Agrobank” ATB bu kabi loyihalarni doimiy tarzda amaliyotga tatbiq etish, sohaga zamonaviy bilimlarni olib kirish orqali aholi va mijozlarga, fermer hamda tadbirkorlarga doimiy ko‘makchi bo‘lib boradi.
Reklama huquqi asosida.
Izoh (0)